Entzun duzue txistea? Zer dute elkarrekin Espainiako errege familiak eta ezker abertzaleak? Biek dituzte kideak kartzelan, erbestean eta erakundeetan. Paralelotasun ausarta areagotzera etorri da Juan Carlos Borboikoa Espainiarekin estradizio itunik ez duen Dominikar Errepublikara aldatuko delako zurrumurrua. Fiskaltzak ikerketa ireki du, Suitzan irekita zegoenaren ildotik, denok lehenagotik ezagutzen zizkioten ustel kasuak argitze aldera.
Kanpoan ikertzen hastea erabakigarria izan da, dudarik gabe, auziari bide emateko, agian eratorriko diren ondorioak kontrolpean edukitzeko estrategian. Kongresuan alderdi nagusiek izan duten jarrerak aski aztarna argia ematen du estatuaren erakunde nagusien trapu zikinak garbitzeko dagoen gogo eskasaz. Kanpotik begira daudenean bakarrik plantak egin behar. Horrexegatik CIAk argitara eman duen egiaztapenak, Felipe Gonzalez presidente ohiak GAL erakunde terrorista sortzeko izan zuen paperaren inguruan, hautsa pixka bat harrotu du, kare biziaren hauts zaharra harrotu ere. Nork ez zekien dagoeneko? Baina orain CIAk dio. Gonzalezek lana aurreratu du. Dominikar Errepublikan etxebizitza omen du dagoeneko. Errege ohiak izanen du beste iheslarien konpainian egunerokoa xamurrago eramatea.
JIRA
Iheslariak
Iruzkinak
Ez dago iruzkinik
Ordenatu