JIRA

Santa Pola

Angel Erro -

2018ko ekainak 21
Nafarroa, gauza jakina da, beti da beste nonbait. Hala uste dugu behintzat bertakook eta baita liburuetan sostengatu ere. Jon Alonsok, esaterako, Nafarroa Sizilia da saiakera laburra sartu zuen Agur, Darwin eta beste arkeologia batzuk liburuan. Xabier Zabaltzak Gu, nafarrok saiakeran Joan Fusterren Nosaltres, els valencians-ekin paralelismoak ezarri zituen, gure erkidegoaren valentziartasuna aditzera emanez. Bere garaian sinetsi dut. Zalantzak, berriz, hasi zaizkit. Joan den udan italiar uhartean eman hamabostaldiak ez zizkidan Alonsoren susmoak berretsi. Berrikiago, Monica Oltra Valentziako lehendakariordeak egin ohartarazpenak guztiz aienatu dit Nafarroak Valentziarekin antzik duelako ustekizunik txikiena ere.

Alacanteko Santa Pola herriko jabetzaren erregistratzaile lanpostuan, 29 urteko lan utzialdiaren ostean, berriz hasitako Mariano Rajoy jaunari jakinarazi dio lanerako valentzieraren ezagutza eskatuko zaiola, legez. Lanpostua harena da, bai, baina herritarrei (haien hizkuntzan arreta jasotzeko eskubidea dutenei) zerbitzua ematekoa da. Horrelakorik eskatu ez, horrela, funtzionarioen betebeharra hain garbi adieraztea ez da gurean irudikagarria. Bilatu beharko dugu nafarrok beste lurralde bat.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna