JIRA

Gihar puztuak

Angel Erro -

2018ko urriak 17
Bertan behera gelditu behar izan da kulturismo lehiaketa bat, Santzurtzin, dopinaren kontrako analisiak eginen zirela iragarri eta gero, lehiakide gehienek txapelketa hasia abandonatuta. Giharrezko diruditen konkorrak airezko gertatu ziren, kimikoki puztuak. Gogoa joan zait, nirea ere ihesean, Espainiako Lan Ikuskaritzak hainbat enpresari langileen lan egoerari buruzko ikuskapen bat abiatuko zutela abisatu ondoren, 46.500 langileren kontratu behin-behinekoak, sorginkeriaz bezala, iraunkor bilakatu ziren. Enpresa horiek ere gihar faltsuaz ari zirela ikusgarriki. Dopatuta. Etekinaren erakuskeria lan harremanaren alde ahulenaren kaltean makurraraziz.

Gihar puztua ere erakutsi ohi dute segurtasun indarrek (Cabacasen heriotzaren kasua, orain epaitzen ari dena, dugu horren adibide gertukoena), ez halabeharrez dopatuta jarduten dutelako, metaforikoki ez bada, egiten dutenaren gaineko inpunitate sentsazioagatik baizik; bidegabekeriak estalita, izenik gabetuta, urtuta, geroratuta izanen direla jakinki. Epaiketara irits daitezke, ez gehienetan, baina gehienok beldur gara giharraren puztasuna honaino iritsiko ote den. Itxaropen izpia gordetzen dut ez dezala inork txapelketa zigorgabe abandona.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna