Askoz gutxiagogatik Ameriketako Estatu Batuek berek esku hartu dute beste herrialde batean bertako demokrazia arriskuan zegoela argudiatuta edo aitzakiatzat hartuta. Harritu nau inork proposatu ez izanak, sarkasmoz bada ere. Nabari da Hugo Chavez ez dagoela bizidunon artean. Baina agian ez da besteon ironia faltagatik. Oraindik edozer gerta daitekeelako baizik. Are atzerriko gerrarik abiatu ez (omen) duen Trump presidenteak barne interbentzio bat egitea ere, militarrek burutua edo zibilek. Horren beldur daude batzuk. Atzo gizon armadun bat atxilotu zuten botoak zenbatzeko zentro batera zihoana, zenbaketa gelditzeko prest.
Iruzurraz ari da Trump eta neurri batean harrigarria da boterearen erpinean dagoenak bere burua biktimatzat saltzea. Kalitate gutxiko beste demokrazietan behintzat karguan dagoenak maneatzen ditu emaitzak, boterean betikotzeko. Gero, Mendebaldeari komeni zaion ala ez, eginahalak eginen dira diktadoregaia erorarazteko, are herrialdean esku hartuz zuzenean.
Presidente izendatuko duten Joe Bidenek dagoeneko iragarri du bere egitasmoen artean nazioarteko lidergoa «berreskuratuko» dutela. Horrek esan nahi du interbentzioek jarraituko dutela, baina atzerrian.
JIRA
Esku hartzea
Iruzkinak
Ez dago iruzkinik
Ordenatu