Albistea entzun

ATZEKOZ AURRERA. Iskander Sagarminaga. Igerilaria

«Niretzat, igeri egitea psikologoarengana joatea bezala da»

Zazpi urte baino ez daramatza Sagarminagak lehiatzen, baina baditu xedeak eta lorpenak. Datorren astean beste erronka bat du: Jerseyko irlari itzulia egin nahi dio. 76 kilometro inguru dira, ur hotzetan.
OSKAR MATXIN EDESA / FOKU Tamaina handiagoan ikusi

Amaia Igartua Aristondo -

2022ko ekainak 8 - Galdakao

Eivissa eta Formentera irlen arteko [Balearrak] igeriketa lasterketan bigarren izan da berriki Iskander Sagarminaga (Galdakao, Bizkaia, 1983); hiru parte hartzailek baino ez zuten bukatu garaiz ibilbidea. Baina entrenamendutzat dauka, datorren astean ekingo baitio benetako erronkari: Jersey uhartearen itzulia.

Nola joan zen Eivissako lehia?

Jendea oso prestatuta joaten da. Hogei parte hartzaileko muga zegoen. Irabazlea, Laura Volpi, Olinpiar Jokoetan egon zen. Iberiar penintsulako probarik gogorrena da, seguruenik: 30 kilometro luze da; jendeak uste du Mediterraneo itsasoa oso lasaia dela, baina haizea sartzen da, eta gora eta behera zoaz. Itsasoaren erdi-erditik goaz. Igerilari bakoitzarekin zodiak bat doa pilotu batekin eta laguntzailearekin, eta batzuk mareatu eta botaka hasi ziren. Irabazteko neukan aukera bakarra zen itsasoa oso txarto egotea.

Orain Jerseykoa duzu. Aurreko emaitzak motibatzen zaitu?

Bakarrik joango naiz. Barku bat alokatu dut. Ez daukat inor kontra, eta aste bat dut egiteko. Batzuetan, itsasoa hain dago mugituta, ezin daiteke egin. 8.000 metroko mendi bat igotzea bezala da: hurbiltzen zara, eta, ikusten baduzu gustura zaudela, saiatzen zara tontorrera igotzen. Jerseykoan, arazoa uraren tenperatura da: 14 gradu; eta 41 milia nautiko daude [ia 76 kilometro]. Motibazioa eman dit lasterketak, ikusi dudalako ondo nagoela; ez nuen minik izan.

Erronka nagusia Jerseykoa da?

Bai. Berez, Eivissakoa zen Jerseyrako entrenamendua. Ehun bat pertsonak bukatu dute historian; lehen euskal herritarra izango nintzateke. Normalean, uztailean eta abuztuan egiten da, eta nik ekainean joatea erabaki dut, neure burua probatzeko, eta ikusteko zelan erantzuten dudan ur hotzagoko erronketan. Urte guztia daramat neopreno barik ur hotzetan igeri egiten, eta ur beroa baino hobeto daramat. 10-12 graduan, ondo egon naiz sei orduz; baina ikusi beharko nola egongo naizen hamar ordutik gora.

Erronkez ari zara: lasterketak eta zeharkaldiak aukeratzean, hori da irizpidea?

Bai: erronka izatea, neure burua ezagutzea. Lekuak ere atentzioa eman behar dit: inguruak, urak, naturarekiko harremanak... Xarma berezia izan behar du. Badaude batzuk fisikoki erronka direnak, baina lekuagatik uko egin diet: adibidez, Gangesekoa [India]. Hor ez naiz sartuko. Lekua deigarria izateak eragina du, baita nire bikotekideari gustatzeak ere [Eider Eibar ilustratzailea; entrenamenduetan eta zeharkaldietan laguntzen dio].

Inguruak errendimenduan ere eragiten du?

Bai. Leku polit batean bazaude, ura garbi badago, arrainak ikusten badituzu... Edo itsasoa apur bat mugituta badago ere, gustatzen zait. Kontu oso psikologikoak dira, eta gorabehera handiak dituzu. Aldarte onak laguntzen dizu aurrera egiten.

Ogibidez informatikaria zara. Nola uztartzen duzu igeriketarekin?

Nire lankide guztiak kirolariak dira, eta haiek ere laguntzen didate entrenamenduetan eta psikologikoki. Lanaren arabera, hilabete batzuetan ez daukat denborarik ezertarako, baina baditut beste garai batzuk lasaiagoak, eta gehiago entrenatzen naiz. Baina entrenamendua beti da lanaren araberakoa, denbora librean, asteburuetan... Ordutegi eta planifikazio jakin batzuk bete behar ditut: joan, egin eta disfrutatu egiten dut; presioa izan barik, psikologikoki askatzailea izan dadin. Ze, niretzat, psikologoarengana joatea bezala da igeriketa, estresa kentzen didalako. Eta estresa sortzen badit, orduan ez du balio ezertarako.

2015ean hasi zinen lehiatzen. Zergatik?

Beti egin dut kirola, bizikleta, futbola, eskubaloia... Zeozer egin nahi nuen osasuntsu mantentzeko, eta igeriketarekin hasi nintzen; txikitatik gustatu izan zait asko itsasoa. Ondo moldatzen nintzen: ikusi nuen dohainak nituela. Lehen saiakera hamar kilometroko lasterketa bat izan zen, Menorcan [Balearrak]; nahiko aurrean amaitu nuen. Hobetuz joan naiz, eta gaur egun nahiko maila ona dut; adibidez, Eivissakoan faboritoetako bat nintzen. Parte hartzaileetako batek esaten zidan: «Ez dut sinisten zu 33-34 urterekin igerian hasi eta niri aurre egiteko kapaz zarenik».

Entrenamenduetan eta zeharkaldietan, Eider Eibarrekin joaten zara. Ur irekietan igeri egiteak dependentzia dakar, ezta?

Eiderrekin joaten naiz, eta badago talde bat Getxon [Bizkaia], Ur irekiak Galea. Inoiz ez naiz joaten bakarrik. Itsasoan norbaitekin joan behar duzu, zure mailako norbaitekin. Gure taldean maila oso handiko igerilariak daude; eduki ahal ditudan taldekiderik onenak dira, eta oso giro ona dago.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©JAIZKI FONTANEDA / FOKU

«Guztiok gatoz leku beretik: guztiok gara afrikarrak»

Unai Etxenausia

'Geu, afrikarrok' aurkeztu du Arrosagaraik, zenbait gazteren istorioak biltzen dituen erakusketa bat, Gasteizko Montehermoso kulturunean. Otsailaren 26ra arte egongo da ikusgai.

«Misiolari gisa bidali nahi gaituzte»

E. Telleria Sarriegi

Natalia Ortiz ikerlariak, besteak beste, Josefina Erezuma bizkaitarraren istorioa jaso du bere ikerketan, Jaime Aberasturi senargaiarekin izan zuen eskutitz trukearen bidez.
1 ©- / EZEZAGUNA

'Marten' hegaldia

Enekoitz Telleria Sarriegi

Francoren erregimenak, Eliza katolikoarekin batera eta Australiako Gobernuarekin tratua eginda, ehunka euskal emakumezko bidali zituen Australiara, 1960ko hamarkadan. Han lana eginaraztea eta aurretik hara bidalitako gizonezkoekin ezkonaraztea zen bidaia haien benetako helburua. 'Marta plana' deitu zioten, eta 'El avión de las novias' dokumentalean jaso dute.

 ©OIER ARANZABAL

«Audio plataforma bat sortuko dugu datozen hilabeteetan»

Urtzi Urkizu

Ikus-entzunezkoetarako Primeran iritsiko den moduan, irrati eta audioetarako beste plataforma bat sortuko dute, Goñik iragarri duenez. «Kolaborazioak sustatuko ditugu euskalgintzarekin».

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Amaia Igartua Aristondo

Informazio osagarria

Iruzkinak kargatzen...