Albistea entzun

Armak utzi ditu Korsikako FLNCk

Uhartean sortutako baldintza politiko berrien ondorioz, desmilitarizazio prozesu bat hasteko erabakia hartu du erakunde armatuak
FLNCko kideak, 1995ean eginiko agerraldi batean.
FLNCko kideak, 1995ean eginiko agerraldi batean. PIERRE MURATI

Iñaki Petxarroman -

2014ko ekainak 26

FLNC Korsikako Nazioa Askatzeko Fronteak iragarri du armak utziko dituela, atzo ezagutarazitako agiri baten bidez. Eztabaida prozesu luze baten ostean, gaur egungo baldintza politikoek eraman dute erakunde armatua erabaki hori hartzera, FLNCk berak agirian azaldu duenez.

Izan ere, nazio askapena lortzeko Korsikak «urrats historiko bat» egiteko aukera duelakoan da FLNC: «Egungo eztabaidagai politiko nagusiak, korsikera, ogasuna, aireportuak, Korsikako itsas konpainia, egoiliarren estatutua, konstituzioaren berrazterketa, garapen ekonomiko eta soziala, oso garrantzitsuak dira gure herriaren etorkizunerako. Mugimendu nazionalak, gure erakundeak, hain zuzen ere, herriaren burujabetza berreskuratzeko xedearekin aurrera eramandako aldarrikapenak dira horiek guztiak».

Egoera politikoa hala izanda, «aurrebaldintzarik eta zalantzarik gabe, klandestinitatetik irteteko eta desmilitarizazio prozesu bati ekiteko» erabakia hartu du.

Bide armatua uzteko erabaki historikoa aitortuta ere, bideak jarraitzen duela gaineratu du: «Ez da historiaren amaiera, kontrakoa baizik; keinu honekin aukera berriak eskaini nahi ditugu burujabetzarako bidean». Hain zuzen ere, prozesu historiko berrian herrialdea gobernatu eta independentziara eramango duen indar politikoa sortu behar delakoan da FLNC.

Erakundeak baikortzat jo ditu Korsikako Lurralde Asanblean hilabeteotan eztabaidatu diren gaiak. Bereziki azpimarratu dute Korsikako ordezkari politikoek egoiliar estatutuaren alde bozkatu izana. Horren arabera, Korsikan etxe baten jabe izateko, bertan gutxienez bost urtez bizi izana justifikatu beharko da. «Neurri ausarta da hori, gure herriaren etorkizunerako itxaropen eta konfiantza handikoa».

Militanteei oharra

Aldi berean, agirian FLNCk dei egin die bere militante guztiei, armak uzteaz gain, bide politikoan ardurak hartzeko, erakunde politiko eta sindikaletan. Ildo horretan, Frantziako Gobernuari eskatu dio preso eta iheslari politikoen auziari irtenbide bat emateko, «askatasuna berreskuratu» ahal izan dezaten.

Korsikako Nazioa Askatzeko Frontea 1976an sortu zuten, eta Korsikako independentziaren alde jarduten duen erakunde armatu nagusia da.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Eric Ciotti, Valerie Pecresse eta LRko presidente Christian Jacob, hurrenez hurren. ©CHRISTOPHE PETIT TESSON / EFE

Valerie Pecresse aukeratu dute LRko presidentegai izateko

Arantxa ElizegiEgilegor

Emakumezko presidentegai bat izango du lehen aldiz eskuin tradizionalak. Militanteen botoen %61 eskuratu ditu Ile-de-France eskualdeko hautagaiak primarioetako bigarren itzulian

Auzi-mediku talde bat Irak iparraldeko Baduxko espetxearen ondoan, bertan topatu zuten hobi komuna azertzen, joan den ekainean. ©AMMAR SALIH / EFE

NBEk «inflexio puntu bat» iragarri du Estatu Islamikoa nazioartean epaitzeko

Gorka Berasategi Otamendi

Unitad ikerketa taldeak adierazi duenez, nahikoa zantzu bildu du frogatzeko fundamentalistek gerra krimenak eta gizateriaren kontrakoak egin zituztela

 ©ALBERTO VALDS / EFE

Txileko ofizialismoak jakinarazi du Kasten alde egingo duela 19ko bozetan

Igor Susaeta

Sichelen esanetan, «ezkerreko populismoa garaitzeko» erabiliko du bere botoa. Bi presidentegaiak publikoki hitz egitekoak dira Parisirekin

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.