Albistea entzun

Maritxu Kajoi Arrasaten

Poteoan dotore ibiltzeko eguna

Gaur ospatuko dute Maritxu Kajoi, Arrasaten; urtero bezala, umorez eta ekitaldiz betetako eguna prestatu dute antolatzaileek
Umorez ospatzen dute Maritxu Kajoi eguna Arrasaten.
Umorez ospatzen dute Maritxu Kajoi eguna Arrasaten. GORKA RUBIO / ARGAZKI PRESS Tamaina handiagoan ikusi

Pello Zupiria -

2017ko urriak 6

Heldu da Maritxu Kajoi eguna, egun garrantzitsua Arrasateko (Gipuzkoa) herritarrentzat. Gogoz apainduriko neskek eta dotore jantzitako mutil gorbatadunek herriko tabernak eta kaleak beteko dituzte gaur, Maritxu Kajoi txikiteroen patroia poteoan omentzeko. Ez da usadio berria: aurten 41 urte dira festa horri hasiera eman ziotela.

Iraitz Agirre Maritxu Kajoi batzordeko kidearen hitzetan, udako jaietatik abenduko San Tomas egunera arteko hutsunea betetzeko jaieguna asmatu zuten Arrasateko gazte batzuek 1976an: «Garai hartako gazte batzuek, uda sasoiaren eta negu sasoiaren artean jai bat egiteko aitzakiaren bila edo, txikiteoa berreskuratu zuten, eta, txantxetan, txikitoak Ama Birjina omentzeko hartzen zituztela eta, ba, hortik Maritxu Kajoi». Hala ere, urteen poderioz, jaia aldatuz joan dela ere esan du: «Jaia eraldatzen hasi zen, herritarrak dotore jantzita ateratzen ziren poteora, hein batean goi klasea irudikatuz, baina betiere poteoan ibiltzera».

Aldatu ez den ohitura eskapularioa lepoan jantzita ateratzea da, eta hori da, Agirrerentzat, egitekorik garrantzitsuena. Ikur kristau horri zentzua aldatu diote arrasatearrek, eta urtero aldatzen duten aldarrikapenak edo mezuak adierazteko tresna bihurtu dute. «Eskapularioa hasieratik dago festan. Berez, ikur kristau bat da, baina Maritxu Kajoi batzordeak egin zuena izan zen horri zentzua pixka bat aldatzea. Hortaz, ustezko Ama Birijnaren ikurra eramaten dugu, eta atzeko partean urteko gertakizun bati keinu bat egiten saiatzen gara: aurten, adibidez, gogoan izan ditugu Altsasuko auzipetuak. Azken finean, hori da eskapularioaren aitzakia», azaldu du Agirrek.

Eguneko beste protagonista, hau da jantzi lirainez eta poteoaz gain, umorea eta txantxa giroa dira. Orokorrean, urtez urte, ez da aldaketarik egiten eguneko egitarau ofizialean, baina egun hori baliatzen dute edonolako txantxak egiteko: «Urtero gustatzen zaigu urtean gertatutako kontuei keinu batzuk egitea. Gure egitaraua, berez, ekintza ofizialak izango dira, eta gero hala moduzko ekintza batzuk, txantxak direnak». Aurten, 08:00etan herria esnatuko duten suziriak Ipar Koreari erositakoak dira, Piongiangen eta Washingtonen arteko tirabirak izan direla eta.

Kataluniako autodeterminazio erreferenduma eta asteotako gertakariak ere ez dituzte ahaztu nahi izan: 12:00etan, zinegotziek casteller bat egingo dute, eta, 21:00etan, We Love Cat ekitaldia egingo dute. Txantxak, ordea, ez dira zertan gai baten inguruan izan: 19:00etan ultra-titan-mega-hiper-turbo-quebrantatoia iraupen lasterketa egingo dute, poteoa gaur hasi eta Iruñeko sanferminak arte luzatzeko asmoz.

Eguna antolatzeaz eta prestaketarako lan guztiak egiteaz arduratzen da Maritxu Kajoi batzordea: jaiarekin batera sortu zen, duela 41 urte. Batzordeak bi ohar nagusi egin ditu: eskapularioa janztea eta sexu erasorik ez dela onartuko gogoraraztea.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©GORKA RUBIO / FOKU

«Tradizioak bezala, dantza maisuaren figura moldagarria da»

Ane Insausti Barandiaran

Xabier Sarriegi 'Pasatxo' dantza maisuari eginiko «omenaldi bat» da dokumentala. Besteak beste, lanbide hori zer zen kontatu dute.
 ©BERRIA

«Ingelesak lekua behar du, baina ez da gure hizkuntza»

Iker Tubia

Hezkuntza eleaniztunari «zukua atera» behar zaiola uste du Zenozek, eleaniztasuna «oso garrantzitsutzat» baitu. Hizkuntzak ikastearen alde mintzatu da, eta hori modu koordinatuan eta baliabide egokiekin egiteko beharraz. Ikerbasquek aitortza egin dio.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Informazio osagarria

Iruzkinak kargatzen...