Albistea entzun

ATZEKOZ AURRERA. Maitena Ihidope. Artista

«Aski torturatua ikusten dut mundua»

Zortzi eskuko erakusketa bat paratuko dute maiatzean Donibane Garaziko gaztetxean. Haietako bi Maitena Ihidoperenak dira: ametsetako zuri-beltzeko barne mundu surrealista batean sartzerat deitzen dute.
GUILLAUME FAUVEAU Tamaina handiagoan ikusi

Ainize Madariaga -

2022ko apirilak 30 - Donazaharre

Maitena Ihidopek (Mugerre, Lapurdi, 1987) Txinako tintaz obra oniriko akromatikoak sortzen ditu. Azkenaldian, paisaiak «arindu», eta pertsonaiei lehentasuna ematen die. Maiatzaren 12tik 15era, Donibane Garaziko Zitadela karrikako 16.ean ikusi ahalko dira, Elorri Lambert, Kamila Gratien eta Ainhoa Iribarne artisten lanekin batera.

Zer fasetan zara?

Lehen, marrazki aski kargatuak egiten nituen, surrealismo beldurgarriz. Orain deskargatu ditut pixka bat, nahiz beti zuri-beltzean egon eta beti gai psikologikoetan aritu.

Onirikoak...

Ametsak, erokeria, falta, mina, transformazioa dira agertzen.

Giro makabroa?

Bai. Magia beltza duten margolanetan murgiltzen naiz.

Zeri deitzen diozu magia?

Ikusi ez baina gertatzen diren gauzei: indarrak, eraldaketa...

Horretara heltzeko, zer manatzen diozu zeure buruari?

Zer gertatzen da eszena horretan? Nola sentitzen dira pertsonaiak? Non daude? Sinpleki. Eta ardura ber erantzunak jiten zaizkit: naturan dira, oihanean edo harpe batean. Aski toki sinbolikoetan.

Aipatu duzu arindu dituzula oraingo kreazioak: zerk akuilaturik?

Pentsatzen dut bortizkeria bat kanporatzen dudala, eta anbibalentzia bat ematen dut margolanetan, bortizkeria horretan ere egon daitekeelako alaitasuna. Katarsi horiek agertzen dira; karga huste batzuk dira.

Zeri ematen diozu orain garrantzi handiagoa?

Giro magikoari, eta zentratzen naiz pertsonaia batean edo bitan: potretak dira gehiago orain egiten ditudanak.

Zer dakarkizu marrazketak?

Plazera. Parada ematen dit jostatzeko eta ikusten dudana erreproduzitzeko. Aski torturatua ikusten dut mundua; iluna bezain alaia, mutur guzietarik ateratzen diren munstroekin egina.

Lehenik pertsonaia, egoera edo paisaia ikusten duzu?

Uzten diot ene eskuari marrak egiten, baitezpada ideiarik ukan gabe, naturalki, egoera bat agertu arte. Adibidez, harpe baten forma agertuko balitz, murgilduko nintzateke harpe horretan, eta egoera bat agertuko litzaidake. Batzuetan, berriz, bai, bisio bat badut, eta eszena berezi bat egin nahi dut. Hor paisaia marrazten dut lehenik, eta gero datoz pertsonaiak mugimendua ematera paisaia horri.

Izenburuek egoera erreal bat salatzen dute: Larunbat goiz batez Morisco lakuan, adibidez.

Eszena batzuk aski ilunak eta suntsitzaileak badira, gero heldu zait ostatu baten iluntasun alai hori. Beraz, izenburuak ondotik heldu zaizkit usu.

Eskulturan ere bazabiltza.

Maskak berrerabiliz totem bat egin dut, publiko jakin batekin aritzeko animazioan, materiala berreskuratzea interesatzen zaidalako. Ez da hain sinplea: forma lodiagoak egiteko bai, baina nik egin nahi nuena egiteko zailago zen.

Herensugea presente da obretan.

Bai, baina arketipoetan egoten naiz, mitologiaren unibertsoan sartu gabe. Erakusketan agertuko da haietako bat, justuki.

Zer duzu erakutsiko gaztetxean?

Tokia murritza baita, artista bakoitzak bizpahiru margolan erakutsiko ditu. Ni grisarekin lanean aritu naiz azken margolanetan, eta marrak finagoak dira.

Polikromiari muzin?

Bai. Beste mundu bat zait; ez naiz oraino horretan sartu.

Baduzu erakusketa gehiagorik bidean?

Udara buruz, Ortzaizeko [Nafarroa Beherea] Menta liburu dendan erakutsiko ditut ene obrak. Artista bakarra izanen naizenez, margolan gehiago erakutsiko ditut, bai ere serigrafiatu nituen kamiseta batzuk, eta afixak ere bai.

Eta proiekturik?

Eskaerak hartzeko prest naiz. Maiatz argitaletxeak ateratzekoa duen liburu baten azala egin dut berriki: helduentzako kondairak dira.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Erroiz olio enpresako kideak, Oinatz Bengoetxea pilotari ohia erdian dutela, atzo. ©JAIZKI FONTANEDA / FOKU

Urre berdearen zukua dastagai

Unai Etxenausia

Lantziegoko Erroiz olio enpresak oliba olio birjina estra berria aurkeztu du. Aurten, Bengoetxea pilotari profesional ohia gonbidatu dute Sustraiak zuku izarra dastatzera.
Txantxangorri bati eta onddo bati sakelakoarekin egindako argazkiek Merlin eta Mushtool aplikazioetan egindako bidea. ©BERRIA

Natura poltsikoan

Enekoitz Telleria Sarriegi

Geroz eta gehiago dira natura behatzen eta ulertzen laguntzen duten sakelako aplikazioak. Behatu litezke mendiak, onddoak, hegaztiak, landareak, zeruak... eta bahetu litezke ondoren behaketak. Adituek diote erabilgarriak, errazak eta herritarrak zientziara hurbiltzeko lagungarriak direla, baina tentuz erabiltzekoak ere bai, ez dutelako beti bete-betean asmatzen.

Jose Ignacio Jauregi —eskuinetik hasita bigarrena—, lankideekin, Michelin izar berdea esku artean dutela. ©IÑIGO URIZ / FOKU

«Ongi elikatutako txerriek zapore hobea dute»

Amaia Jimenez Larrea

Lekunberriko Maskarada jatetxeak Michelin izar berde bat lortu du orain gutxi. Jatetxearen jasangarritasuna saritu dute, 'euskal txerri' izeneko arraza nola tratatzen duten aintzat hartuta.
 ©TAMARA ARRANZ

Ez ote da beranduegi autoeskolarako?

Mikel Yarza Artola

Borja Cobeagak 'No me gusta conducir' telesaila estreinatu du, gidabaimena 40 urterekin atera nahi duen gizon baten inguruko komedia

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Ainize Madariaga

Informazio osagarria

Iruzkinak kargatzen...