Euskaltegietan, «malgutasuna» oinarri

Malgutasuna: euskara ikasteko aukera ezberdinak. Hori izango da ikasturte honetan euskaltegietako ikasleei egingo dieten eskaintza, atzo Gasteizen egindako aurkezpenean nabarmendu zutenez. Hain zuzen, euskara ikasteko «formula» hautatzeko aukera izango dute, eta, horretarako, EAEko erakundeek eta euskaltegiek kanpaina bat egingo dute, Euskara ikasteko zure formula lelopean. Guztira, lau aukera egongo dira euskara eskolak hartzeko: aurrez aurrekoa, jardun bikoa, autoikaskuntza eta bideokonferentzia bidezkoa. Bingen Zupiria Eusko Jaurlaritzako Hizkuntza Politikako sailburuak jakinarazi du matrikulan jarritako dirua itzuli egingo dietela B2 mailako edo beheragoko ikasleei, %75eko asistentzia bermatuta eta azterketa gaindituta.