Martxoaren 3aren ezaugarri

Martxoaren 3ko gertakarietako pertsonarik ezagunenetako bat hil zen igandean Gasteizen: Jesus Fernandez Naves (1934-2021). Jaiotzez, asturiarra zen (Espainia); 1975ean iritsi zen Arabako hiriburura, eta 1976ko martxoaren 3ko greban parte hartu zuen. Gertakarien ondoren espetxeratu egin zuten. Ordukoak gogorarazteko lanean jardun izan du. Mercedeseko 1987ko protestetan ere jardun zuen, eta Gasteizko talde antimilitaristako sortzaileetako bat ere izan zen 1990eko hamarkadan. Besteak beste, bertan militatu izan du, gaixotu artean.