Genero bortxaren aurka, prebentzioa landuko du EHUk protokolo berrian

2012koa moldatu du. Ingurune seguru bat eraikitzea eta mantentzea du helburu. Neurri berrien artean, batzorde berezi bat eratuko da
Protokolo berria aurkezteko ekitaldia egin zuten atzo.
Protokolo berria aurkezteko ekitaldia egin zuten atzo. LUIS JAUREGIALTZO / FOKU

Peru Azpillaga -

2018ko ekainak 15
Indarkeria matxistaren aurka 2012an sortutako protokoloa eguneratu du EHU Euskal Herriko Unibertsitateak. Prebentzioan jarri nahi dute indarra, «ingurune seguru bat eraikitzean», baina erasoei erantzuteko ere prestatu dira: genero indarkeria kasuez arduratuko den batzorde bat eratuko dute. Neurrion bidez, EHUk konpromisoa hartu du bortxa hori pairatu duten pertsonei laguntza eskaintzeko, behar diren baliabideak jarriz eta irtenbide zehatzak bilatuz.

Leioako campusean (Bizkaia) aurkeztu zuten atzo protokolo berritua. Han izan ziren Leire Imaz Zubiaur EHUko Berdintasun zuzendaria, Izaskun Landaida Emakundeko zuzendaria eta Nekane Balluerka EHUko errektorea. 300 lagun baino gehiagoren parte hartzearekin moldatu dute protokoloa: ikasleak, irakasleak, ikertzaileak, langileak... «Tresna garrantzitsua izango da unibertsitatearen espazio fisikoan zein birtualean gertatzen diren genero indarkerien aurka egiteko, baita horiek pairatu dituzten kideei laguntza eta babesa eskaintzeko ere», esan zuen Imazek.

Honela definitu du protokoloak genero indarkeria: «Genero arrazoiengatik eginiko indarkeria fisiko eta psikiko ekintza oro, sexu abusuak eta erasoak barne, baita sexu jazarpena eta sexuagatiko, genero identitate eta adierazpenagatiko edo sexu orientazioagatiko jazarpena ere». Hala, EHUk bortizkeria horiekin lotutako jarrerak desagerrarazteko helburua jarri du. Batetik, berebiziko garrantzia emango dio prebentzioari, indarkeriari aurrea hartzen saiatzeko: informazioa, prestakuntza, sentsibilizazio kanpainak... Bestetik, batzorde berezi bat sortuko dute; hainbat neurri hartu ahal izango du, bortxa pairatu dutenen segurtasuna bermatzeko, salaketa jartzeko erabakian laguntzeko edo erasotzaileari espediente akademikoa zabaltzeko. Intimitatea bermatzeko neurriak ere eskainiko ditu.

Espedientea irakasle bati

Martxoaren 8an, Emakumeen Nazioarteko Eguneko mobilizazioen harira, Leioako unibertsitateko Mugimendu Feministak salatu zuen irakasle batek bi ikasle makila batez jo eta beste batzuk iraindu zituela. BERRIAk jakin ahal izan duenez, irakasle horri diziplina txostena ireki diote. «Instruktore batek darama kasua, eta ebazpena ateratzen denean jakingo dugu zer ondorio egongo diren», adierazi dute berdintasun batzordeko iturriek.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna