Bidasoa-Txingudi Mugaz Gaindiko Partzuergoak antolatzen du Bidasoa Folk, eta Joxean Martin da jaialdiko zuzendaria; hark aukeratzen ditu, urtez urte, Hendaian (Lapurdi), Hondarribin eta Irunen (Gipuzkoa) joko duten musika taldeak. Aurten, bost kontzertu «oso plural» egingo dituzte, zinegotziaren esanetan.
Hendaiak egingo dio jaialdiari harrera gaur: Mixel Etxeberri abeslari baxenabartarrak irekiko du gaur jaialdia, Gazteluzahar frontoian: «Grabatu berri du 28. albuma, euskaraz. Frantsesez ere abesten du, baina, oraingoan, euskaraz abestu du, eta batez ere album horretako abestiak egongo dira entzungai», azaldu du.
Ondoren, O'Carolan taldearen txanda izango da, 22:30ean hasita: «Beste eskualde eta kultura batzuetako pieza tradizionalak jotzen dituzte: Espainiakoak, Frantziakoak, Europa erdialdekoak... beste estilo bat da, instrumentu sorta handiak erabiltzen ditu, eta hamaika ñabardura ematen dizkio bere musikari».
Hendaiako kontzertuen ondoren, Hondarribiak hartuko du lekukoa, bihar: Arma plazan, Ensemble Andalusi del Mediterraneo taldeak joko du. Haren ibilbidea zein den kontatu du Silanesek: «XIII. eta XIV. mendeetan zabaldutako musika jotzen dute, Al Andalus gisa esaten zitzaiona. Maroko inguruko soinuak berreskuratzen dituzte, moldaketak eginez».
Atzetik, Celina da Piedadek emango du kontzertua: soinu jotzaile, kantari eta konpositore portugaldarra da, eta oso gazte hasi zen musikaren munduan, zinegotziaren arabera: «Oso txikitan hasi zen musika ikasten, 5 urterekin, eta bere lehen kontzertuak goiz egin zituen. Hainbat musikari ezagunekin lan egin izan du».
Amaitzeko, etzi, Irungo Juncal plazan Uxia eta Javier Ruibalek joko dute. Galizia eta Andaluziakoak (Espainia) dira, eta, besteak beste, Rosalia eta Lorca poeten lanak musikatzen dituzte.
Helduak, «leialak»
Parte hartzaileei dagokienez, normalean, jaialdian, jende heldua elkartzen dela adierazi du: «Asmoa da gazteak ere hurbiltzea, baina egia da gaur egun kostatzen zaigula. Kultur programazioa osatzen dugunean ikusten dugu gazteek beste lehentasun edo tresna batzuk dituztela musikaz gozatzeko». Helduak joaten dira gehienbat, eta «fluxu bat» dagoela azaldu du, batzuk «oso fidelak» direlako: hiru herrietako kontzertuetara joaten dira.
Kontzertuetara joateko dei egin du zinegotziak, ezohiko taldeakentzun ahal izateko: «Jaialdi honek ematen duen aukera hori da: beste kultura eta musika mota batzuk ezagutzea».
Bidasoa Folk jaialdia
Gaurtik igandera, 21:00etan, Hendaian (Lapurdi), Hondarribian eta Irunen (Gipuzkoa).
