Pentsioak %0,9 igoko ditu Madrilek, baina gobernua osatu ondoren

Igoko dituzte, baina ez %0,25, legeak aurreikusten duen moduan. Hauteskunde kanpainan hitzemandako %0,9koa ezarriko du Pedro Sanchezek (PSOE), baina gobernua osatzean. Neurriak atzerako eragina izango luke: alegia, urtarriletik gobernua osatu bitarteko denborari dagokion igoera ere jasoko lukete pentsiodunek; atzerapenarekin, baina.

Espainiako Gobernuko jarduneko bozeramaile Isabel Zelaak azaldu duenez, sozialistek ez dute egoki ikusten halako neurri bat beren kabuz ezartzea. Gaineratu du, halaber, «gainkostu» bat izango lukeela, eta pentsiodunentzat «nahasgarria» izango litzatekeela orain igotzea legeak ezarritako %0,25 eta, behin %0,9ko igoera ezartzean, ordura arte ordaindu gabe utzitako %0,65eko aldea ematea.

Mariano Rajoyren gobernuak (PP) 2013. urtean aldatu zituen pentsioen legeko puntu batzuk: ezarri zuen, besteak beste, %0,25eko gutxieneko igoera ezartzea urtero, eta KPIari dagokiona kentzea. Puntu hori bertan behera utzi du Sanchezen jarduneko gobernuak. Hala jakinarazi du Zelaak, ministroen kontseiluaren ondoren eginiko agerraldian. Horrez gain, beste neurri batzuk iragarri ditu.

Hala, eta pentsiodunekin lotuta, Zelaak jakinarazi du 2011ko erreformak ez diela eragingo 2013ko apirilaren 1a baino lehen erretiroa hartzera behartutakoei, haien egoera aurreko legediaren arabera arautuko dela, zeina onuragarria den —besteak beste, txikiagoa da erretiroa hartzeko gutxieneko urte kopurua eta kotizatu beharreko denborarena—. Zelaak azaldu duenez, neurri horrekin lagundu egin nahi diete krisi garaian kaleratuak izan ziren adinekoei, lanera berriz itzultzeko arazoak izan eta erretiroa hartzeko behar beste kotizatzeko aukera izan ez dutenei.

Gutxieneko soldata

Lanbide arteko gutxieneko soldata igotzeko aukeraz ere mintzatu da Zelaa, baina horri buruz ere esan du gobernua osatu arte itxarongo dutela. Iaz, %23 igo zuten, Unidas Podemosekin adostuta. 900 eurokoa da gaur egun, eta legealdiaren amaierarako 1.200ekoa izango dela hitzeman zuen Sanchezek.

Bestalde, Zelaak jakinarazi du ez dutela aldaketarik egingo autonomoen kotizazio moduluetan. Horrez gain, iazko —eta 2018ko— aurrekontuak luzatzea adostu du gobernuak. Azken urteetako bozengatik, ezin izan dituzte berritu.