Gaur, Shut up! Twist again! Baionako taldeak emanen du lehen kontzertua. Ondotik, Kaliforniako (AEB) Good Ridance punk taldea iganen da taula gainera, eta Stuck in the Sound, Pace eta Uneek taldeekin bururatuko dute gaualdia.
Bihar, gunea 16:00etan irekiko dute, eta haurrentzako gune bat utziko dute. Kontzertuak gauean hasiko dira, Sheep'n'beer taldearekin —Irlandako musika joko dute— eta Rita Macedo eta Le Parti Collectif arituko dira ondotik. Hainbat musika estilo entzungai izanen dira, Delinquent Habbits ere ariko baita hip-hop musika egiten, eta bide beretik segituko du Naughty J DJak.
Antolatzaileek adierazi dute «indar berezi» bat egiten dutela ingurumena errespetatzeko. Bil Ta Garbirekin hitzarmen bat eginik, plastikoaren erabilera apaltzen saiatuko dira, komun idorrak baliatuko dituzte, eta hondakinak bereiziko dituzte. Gainera, hemengo produktuak lehenesten dituzte, «tokiko ekoizpenak soilik baliatuz».
Hizkuntzari dagokionez, gunean dena elebidunez izanen dela segurtatu dute —euskara eta frantsesa— eta erdaldunek tabernan euskaraz manatzeko kit bat izanen dute eskura.
Festilasai
Gaur eta bihar, Miarritzen (Lapurdi).