Kolorez beteko dira bihar Ordiziako kaleak, euskal jaietako azoka berezian. Baserriko bizimoduak eta produktuek hartuko dute herria. Bada, ordea, produktu guztien artean nabarmendu beharreko bat: Idiazabal gazta. Ardi latxaren esnearekin egindako gazten lehiaketa egingo dute aurten ere; 13:30ean banatuko dituzte sariak, Beti Alai pilotalekuan. Jarraian, gazta irabazlearen erdia salduko dute enkantean.
Barazkiak eta animaliak
Gaztarenaz gain, fruta, barazki eta perretxiko lehiaketak ere egingo dituzte azokan; Jose Migel Barandiaran plazan izango dira, eta 12:00etan banatuko dituzte sariak. Elikagaiek ez ezik, animaliek ere badute tokia Ordizian, eta ganadu eta Lumagorri txapelketak ere egingo dituzte. Horien sari banaketa 12:30ean izango da, Garagartza plazan.
Aste berezia izan ohi da euskal jaietakoa ordiziarrentzat; aurtengoa, gainera, bereziago bihurtu da, herriaren 750. urteurrena batu baitzaio. Ospakizunetan dabiltza herritarrak, eta bihar ere izango dute tartea, bisita gidatu antzeztua egingo baitute arratsean. Antzerkiaz gain, musikak, bertsoek eta kirolak girotuko dute biharko azoka.