Magia herriz herri

MagialdiAraba jaialdia abiatuko da gaur Izarran. Laugarren aldia du aurten, eta lurraldeko 11 herritara eramango ditu ikuskizunak

Aitor Biain -

2018ko irailak 6
Magiaz eta liluraz beteko dira Arabako txoko guztiak gaurtik aurrera. MagialdiAraba jaialdia abiatuko baita gaur, Izarran. Datozen bi asteburutan izango da martxan jaialdia, eta lurraldeko 11 herritara eramango ditu magia ikuskizunak.

Laugarren aldia du aurten MagialdiArabak, eta hilaren 17an Gasteizen hasiko den 30. Magialdiaren atariko jaialdia da. Gasteizko magia jaialdiari zabalkundea emateko sortu zuten, 2015ean, baina urtez urte egonkortuz eta haziz joan da ikuskizunak hiriburutik lurraldeko gainerako herrietara eramaten dituen egitasmoa.

Ikuskizunak eta tailerrak

Aurten, guztira, Arabako 11 herritatik igaroko da jaialdia. Izarran izango du abiapuntua, eta Zalduondon amaituko da, hilaren 16an. Tartean, hurrenez hurren, Gesaltza AƱanatik, Okinatik, Okondotik, Laudiotik, Buradon Gatzagatik, Lantarondik, Gaubeatik, Maeztutik eta Bastidatik ere pasatuko da.

Hodei eta Tor magoak izango dira magia ikuskizunak burutuko dituzten bi artistak. Euskaraz eta gazteleraz ariko dira oholtza gainean ikusleak txunditu nahian. Ikuskizun landuez gain, halere, hurbileko magia ere egingo dute; oholtzatik jaitsi eta ikuslearengana hurbilduko dira bi magoak. Magia bertatik bertara ikusteko aukera izango dute bertaratzen diren guztiek.

Haurrentzako magia tailerrak ere burutuko dituzte. Euskaraz izango dira guztiak, eta gehienez 20 haurrek parte hartu ahalko dute txanda bakoitzean. Magia trikimailuak ikasteko aukera izango da.

MagialdiAraba

Arabako 11 herritan, gaur hasi eta irailaren 16ra bitarte.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna