Musika izango da gaurko ikuskizun gehienen erdigunea, eta kalea izango dute kokaleku. 10:30ean, herriko txistularien kalejira hasiko da; gero, 12:00etan, Artelanek kalea animatuko du. Bi ekintza egongo dira aukeran 13:00etan: batetik, Atako Bandaren dantza saioa; eta, bestetik, Maialen Lujanbioren eta Fredi Paiaren bertsoak, Alameda plazan eta Alde Zaharrean.
Jarraian, lasai bazkaltzeko aukera izango dute festazaleek, 18:00 arte. Ordu horretan, Bentazaharreko Neska Mutiko Alaiek musika ikuskizuna emango dute; Kofradia Zaharraren aurrean hasi, eta Itsasaurre plazan amaituko da.
Handik Zubi Zaharrera aldatuko da jaia. Nasapuntakoa egongo da 18:30ean, eta Allarte Elkarteak oihal eta trapezio ikuskizuna egingo du 19:30ean.
Iluntzetik aurrera, musikak berreskuratuko du protagonismoa andramaixetan: bi erromeria egongo dira 20:00etan: bata Jokaldirena, Kafeatzean; bestea euskal erromeria, Alde Zaharrean entzun ahal izango dena. Musika plazak ere bi kontzertuko hartuko ditu: Ezbaianena, 22:30ean; eta Repercusion, Gaz Limbo eta Klag Klub taldeena, 00:30ean. Oihan Vega DJak jarriko dizkie azken doinuak aurtengo andramaixei, 00:30etik aurrera, Itsasaurre plazan.