Villabonako bikote bat hil du positibo emandako auto gidari batek Espainian

Donejakue bidea egiten ari ziren andre-gizonak, eta Leonen harrapatu ditu autoak. Haiekin zihoan 12 urteko semea ere; zauri arinak izan ditu
Guardia Zibilak, atzo, Villabonako andre-gizonak hil ziren lekuan.
Guardia Zibilak, atzo, Villabonako andre-gizonak hil ziren lekuan. J.CASARES / EFE

Garikoitz Goikoetxea -

2018ko ekainak 29
Alkoholaren eraginpean zihoan gidari batek harrapatuta, Villabonako (Gipuzkoa) andre-gizon batzuk hil ziren atzo. Donejakue bidea egiten ari ziren bizikletan, eta Matallana de Valmadrigal herrian izan zuten istripua, Leonen (Espainia). Ibilgailuak emandako kolpe handiaren eraginez, errepidean bertan zendu ziren biak. Haiekin batera zihoan 12 urteko semea ere; arin zaurituta dago.

Ezbeharra 11:00ak aurretxoan gertatu zen, N-601 errepidean. Bizikletan zihoazen gurasoak eta semea, eta ibilgailu batek harrapatu zituen. Gidariak ihes egin zuen. Lekuko batzuek larrialdi zerbitzuetara hots egin zuten, eta autoari buruzko datuak eman zituzten; Guardia Zibilak handik hamazazpi kilometrora atzeman zuen. Alkohol proba egin zioten gidariari, eta nabarmen gainditu zuen gehienezko tasa: litroko 1,16 miligramo alkohol zuen. Gehienezkoa baino bost aldiz gehiago. Asegururik gabe zihoan, gainera.

Kolpe handia jaso zuten hildako andre-gizonek, eta haien gorpuak metro batzuetara aurkitu zituzten. Semeak zauri arinak ditu; txirrindulari federatua da.

Amasa-Villabonako Udalak bozeramaileen batzordea bildu zuen atzo. «Nahigabea» adierazi du gertatutakoagatik, eta babesa agertu die senideei. Iragarri du epaiketan akusazio partikular gisa aurkezteko asmoa daukala.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna