Gernika-IDK derbia eta Araski-Cadi la Seu Kopako final-laurdenetan

Otsailaren 28tik martxoaren 3ra jokatuko dute txapelketako azken fasea, Gasteizen. Girona eta Perfumerias dira irabazteko faboritoak

IDK-ko Iulene Olabarria, Araskiko Juana Molina eta Gernikako Itziar Ariztimuño, atzoko zozketan. M.DEL VALLE / FOKU.
ainara arratibel gascon
2019ko urtarrilaren 16a
00:00
Entzun
Aukera asko zeuden, eta horietako bat bete da. Derbi bat izango da saskibaloiko Espainiako Kopako final-laurdenetan: Lointek Gernika Bizkaia eta IDK Gipuzkoa elkarren aurka ariko dira. Araskik, berriz, Cadi la Seu izango du aurkari. Txapelketa otsailaren 28tik martxoaren 3ra jokatuko da, Gasteizko Mendizorrotza kiroldegian. Girona eta Perfumerias Avenida dira Kopa irabazteko hautagai nagusiak

Zozketa atzo egin zen, Artium museoan. Nahaste baten erruz, hiru aldiz aldatu zituzten kanporaketen adarrak. Kopako berritasun nagusia denboraldi honetan zortzi taldek jokatuko dutela da, eta ez seik, aurreko sasoietan bezala. Horrenbestez, ligako lehen itzuliko bi sailkatuak —Girona eta Perfumerias Avenida— ez dira zuzenean finalerdietarako sailkatu, eta haiek ere final-laurdenak jokatu beharko dituzte.

Derbia martxoaren 1ean izango da, 19:30ean. Lointek Gernika Bizkaia denboraldi oso ona egiten ari da. Bizkaitarrak hirugarren postuan daude ligan, Girona eta Perfumerias Avenida liderrengandik bi garaipenera. Gainera, iragan astean lau puntu eskasengatik geratu ziren Eurokopako final-zortzirenetatik kanpo. «Ilusioz» helduko diote Kopari, Juana Molina jokalariak nabarmendu zuenez: «Denboraldi osoan egiten ari garen joko ona egin nahi dugu Kopan ere».

IDK Gipuzkoa, ordea, ez da izango aurkari samurra. Azu Muguruzaren jokalariek aurreko sasoiko balentria errepikatu nahi dute; eta, gutxienez, finalerdietarako sailkatu. Duela aste batzuk gai izan ziren ligan bizkaitarrak mendean hartzeko: 65-64. Ez zen nolanahiko garaipena izan, azken laurdenean hamar puntuz egon baitziren atzetik gipuzkoarrak: 43-53. «Berdin sufrituta irabaziko begenu ere, pozik ginateke. Ziur norgehiagoka lehiatua eta orekatua izango dela, Gernikaren aurkako guztia bezala», adierazi zuen Iulene Olaberriak; Perfumerias Avenida-Al Qazeres kanporaketako garailea izango du aurkari. Hain zuzen ere, Perfumerias Avenida da egungo Kopako txapelduna, eta hark utzi zuen finaletik at aurreko sasoian IDK.

Araskik zoria alde izan zuen atzoko zozketan, zerrendaburuen artean ahulena egokitu baitzaio: Cadi La Seu (otsailaren 28an, 19:30ean). Etxean jokatuta, zaleen babesa izango dute arabarrek, baina ez dira fio. Izan ere, ligan 55-69 galdu zuten kataluniarren aurka. «Guretzat kontrario deserosoa da. Oso lehen itzuli ona egin du, eta ñabardura txikietan erabakiko da partida. Oso garrantzitsua izango da lasai jokatzea»,azaldu zuen Laura Pardo Araskiko jokalariak.
Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.