Albistea entzun

ARKUPEAN

Bizi Berri planak, datu eta neurrietatik haratago

M. Josune Ariztondo Akarregi -

2021eko otsailak 23

Erabateko itxialdia amaitu berri zela prestatu zuen Eusko Jaurlaritzak iazko maiatzean Bizi Berri plan irekia, deseskalada aldirako lehen neurriak azaltzen zituena. Helburu orokorra, COVID-19aren izurriteari aurre egitea, lau ataletan banatzen zen: erabateko etxeratzea ekiditea, osasun zerbitzuen kolapsoa urruntzea, hezkuntza presentzialari eustea eta koma ekonomikoari ihes egitea. Horretan gabiltza oraindik ere.

Esan dezadan Europako herrialdeen estrategiekin lerratuta dagoela Bizi Berri. Hainbat dira antzeko erreferentziak eta neurriak dituzten herrialdeak, Alemania, Austria, Frantzia edo Danimarka, kasurako. Denok datoz bat Gaixotasunen Prebentziorako eta Kontrolerako Europako Zentroak (ECDC) bigarren ardatzean dioenarekin, hain zuzen (www.ecdc.europa.eu).

Bizi Berri plan irekia da, pandemiak ekarritako osasun arazo eta kalte ekonomiko larriek halaxe eskatzen baitute. Bizi Berri II iazko urrian argitaratu zen, epealdi baten beharren araberako helburuak eta jardunak egokitzeko, eta lau hilabetera, agindu bezala, Bizi Berri III aurkeztu da. Patxadaz irakurtzea merezi dute biek.

Bizi Berri II-k erreferentziazko eszenatokiak garatzen ditu. Berdetik gorrira arteko 5 maila eta egoera 3 parametroren bidez zehazten dira: intzidentzia metatua (14 egunetan bildutako positiboak 100.000 biztanleko), birsortze tasa (transmisioaren indizea) eta ospitaletako ZIU zainketa intentsiboen unitateetako okupazio maila.

Hilabete hauetan datuak interpretatzen ikasi dugu, badakigu oinarrizko neurriez gain zeintzuk beste gorde behar ditugun, noiz goazen okerrera edo hobera, zeintzuk diren espaziorik eta jardunik arriskugarrienak, zeintzuk pertsonarik zaurgarrienak… Zerbait baino gehiago ikasi dugu. Hauxe da Bizi Berri II-ren ekarpenetako bat. Bestea, egoeraren ahuleziak eta indarguneak azaleratzea edo zer den kalte eta zer mesede adieraztea, batzuk ekiditeko eta besteak indartzeko.

Azkenik, moralina-lezioak bailiran kritikatu dutenen ondoan, nire ustez, elkarbizitza oinarriak dira Bizi Berri II-k gogoratzen dizkigunak, ezinbestekoak egoera izugarri honetan. Hirugarren bertsioak ere hasiera-hasieratik gogoratzen dizkigu euskal kulturaren osagarri eta erronka diren elkartasuna, apaltasuna edo erantzunkidetasuna.

Bizi Berri III ekainera arteko jardunak zein ohitura-moldeak pandemiaren bilakaerari egokitzera dator, oinarri etikoak lehenetsiz eta aurreko bi bertsioak barnean hartuz. Astia dugu datozen lau hilabeteetan plana aztertu eta bere bi hipotesietatik bat —lehena— gerta dadin geure ahalegin solidarioa egiteko. Hala izan bedi.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna