LARREPETIT

Nomada

Maddi Ane Txoperena Iribarren -

2018ko ekainak 27
Ez dut sekula jakin zer erantzun «Nongoa zara?» galderari. Mila aldiz pentsatu izan dut erantzun perfektu posiblea, baina oraindik ere urduri jartzen naiz galdetzen didatenean, eta totelka hasten naiz erantzuten: hangoa, eta hemengoa, eta... Jendeak, oro har, ez baitu ulertzen nola izan zaitezkeen aldi berean leku batekoa eta bestekoa. Eta orduan, azalpenik emateko gogorik ez dudanean, bata ala bestea erantzun ohi dut, galdetzen didan pertsonaren arabera. Edo biak batera, baina lotsagorrituta.

Ezagun batek behin soluzio polita proposatu zidan: nongoa naizen bainoago, nondik natorren erantzutea, izan aditzaren lekuan etorri jarrita. Alegia, goizean esnatu zaren lekuaren arabera pentsatzea erantzuna. Hala ibili ohi zen bera: «Ermutik nator orain, eta Soraluzera noa; Donostiatik nator, eta Baionarantz»... Polita iruditu zitzaidan jolasa, ez zuelako ematen erantzun geldorik; etengabeko mugimenduan aritzeko aukera ematen zion; nomada ibiltzeko beta. Eta erdi-nomada sentitzen garenontzat, ez dago hala izaten utzi eta ulertua sentitzea baino askatasun handiagorik.

Euskal Herria Zuzenean festibalak ere nomada izaera hartu du aurten, ez baitaki xuxen bere burua definitzen memento honetan. Azken urteotako aldaketek eta iazko festibalaren bertan behera uzteak eraman dute gogoeta prozesu sakonera. Eta ari da, pixkanaka, bere bidearen bila. Bitartean, egun-pasa bat eta gaupasa bat antolatu dituzte gazteek Baigorrin, Baionan eta Itsasun, izpirituari eutsiz, berriro ere egitarau oparoa prestatuta. Ezen, agian hain ezagunak ez izanagatik, ziur harrituko gaituzte aurten ere Yassassinek, Kolingak, antzerki emanaldiek... Ez da txarra nomada izatea, baldin eta ongi badakizu nondik zatozen; eta nora zoazen agian ez, baina bai norantz; edo nora ez. EHZk ongi daki hori guztia, eta, premia ikusten badu, aurkituko du bere bidea. Ez nau bereziki kezkatzen.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna