LARREPETIT

Ordu txikitan

Maddi Ane Txoperena Iribarren -

2019ko urtarrilak 16
Ostikoz bota zioten atea, joan den asteartean, goizaldeko ordu txikietan. Nafarroako Foruzaingoko eta Espainiako Poliziako kideak ziren deitu gabe zihoazenak, oihuka mintzoka. Eta zer nahi zuten? Ustez: Rozalejoko markesaren jauregiko segurtasun baldintzak behatzea. Egiaz: Maravillas gaztetxeko kideei ateak itxi eta hilabeteotan guztiotan eraikitakoa bi egunez suntsitzea.

Gaztetxea ixtea nahikoa ez, eta Iruñeko Alde Zaharra setiatuta eduki dute azken egunotan, gerla egoera bat balitz bezala. Balitz bezala? Gure begiez eta herri komunikabideen irudiei esker ikusi ahal izan ditugu polizia tropak alde zaharrean patruilatzen, kaskoz, borraz eta gomazko pilotak botatzeko eskopetaz armaturik (foam-ezkoak izanen ziren akaso, baina hori bada zuzenean aurpegira tiro egiteko aitzakia...).

Donostiako Alde Zaharreko Kijera gaztetxea hustera ere goizeko ordu txikitan bidaliko dituzte ertzainak, segur aski. Bidal zitzakeen bi kasuetan EAJk, eta, bidaltzekotan, egun argiz ere. Baina, ez: zertarako eman aurpegia, gauez joatearen terrorea zabaltzeko aukera izanez gero? Ordu txikitan joateak erran nahi baitu egunotan guztiotan gazte ugarik ezinen dutela lasai lo egin; batzuek, are, gaztetxean pasatuko dituztela gauak, autogestioz eraiki duten proiektuaren zaintzan; sakelako telefonoak ezinen ditugula itzali ezta kazetariok ere, badaezpada; eta iluntasunean egin beharko dietela aurre hurbiltzea lortzen duten herritarrek lehendabiziko kolpeei; jendea babesa ematera iristen den arte.

Duela ez hainbertze euskal gazte independentistak ordu txikitan atxilotzen —eta ondotik torturatzen— zituztenekoa ekarri dit gogora egunotako argazkiak. Horien bila ere ordu txikitan joan ohi ziren, eta, gerora ikusi denez, lotarako arazoak dituzte horietako anitzek ordutik. Barne kontseilu horietako kidea banintz, bi aldiz pentsatuko nuke: etorkizunean.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna