Albistea entzun

LARREPETIT

Kosmosa iraultzailearentzat

Hedoi Etxarte -

2021eko martxoak 27

Parisko Komunak 150 urte bete dituela-eta, Susan Buck-Morssen (The Dialectics of Seeing, 1989) albora itzuli naiz. Okasioek nabarmen baldintzatzen dute aurrez ezagutzen dugun horretan topatuko duguna.

Liburuan Buck-Morssek Benjaminen galerien inguruko hausnarketa aztertu, zabaldu eta kokatu zuen. Benjaminek toki nabarmena eman zion XIX. mendeko Frantziako iraultzaile nabarmenenetako bati: Louis Auguste Blanquiri. Blanquik mende hartako Frantziako iraultza guztietan parte hartu zuen, tradizio eta antolakuntza iraultzaile propio bat sortzeraino. Baina iraultzailearen tripetan mundu ikuskera oso bat zegoen, Benjaminek Baudelaire eta Nietzscherekin kokatu zuena: «Baudelairek mundutik erauzten dituen izarrak dira Blanquik betiereko iraultzan eszenatoki bihurtzen dituenak». Kapitalismo garatuko hiru pertsonaia horiek, Buck-Morssen ustez, «ilusio falta partekatzen dute; komunean dute erantzun politiko oker bat». Nietzsche nihilismoarekin lerratzen da, Blanqui etengabeko putsch-arekin eta «desesperazio kosmologikoarekin», eta Baudelaire «haizearen eta euriaren kontra borrokatzen duenaren haserre inpotentean» geratuko da. Eredu bat izan zen Blanqui, Engelsek aitortu zion bezala, baina bere marko politikoak konspiratzeko besterik ez zuen balio. Idatzi zuen Baudelairek, egunerokotasun tamalgarriz: «Ekintzak ametsarekin inoiz bat egingo ez duen mundu batetik alde egitea nahikotzat joko dut».

Parisko Komunako egunak Fort du Taureauko kartzelan pasatu zituen Blanqui agureak. Espekulazio kosmologikoak idatzi zituen. Harentzat fantasmagoria eta infernua gauza bera ziren, eta unibertsoa ez zen progresoa baizik eta katastrofea. Askapenaren porroten betiereko itzulerek akitutako agureak idatzi zuen: «Berria dena beti da zaharra eta zaharra etengabeki berria. [...] Ez dira mamuak. Orainaldi eternizatuak dira. Baina hemen dago arrakala: ez dago inolako aurrerapenik. Tamalez!».

Beste bizardun batzuen oihartzunek marraztuko zuten iristear zen XX.a.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...