Errazkinek eta Intxaurrandietak aldeko sententzia jaso dute

GHK-k salatu zituen, errauste planta geratzeagatik. 46 milioi eurorainoko zigorra zuten mehatxu

Bi auzipetuak auzitegira bidean, iragan apirilaren 12an, Madrilen; erdian, diputatu nagusi ohi Martin Garitano —babesa ematera joan zitzaien—.
Bi auzipetuak auzitegira bidean, iragan apirilaren 12an, Madrilen; erdian, diputatu nagusi ohi Martin Garitano —babesa ematera joan zitzaien—. J. DANAE / FOKU

Arantxa Iraola -

2018ko urriak 11

«Guk hartutako erabaki guztiak eta emandako pauso guztiak juridikoki akasgabeak izan ziren». Ainhoa Intxaurrandieta, Iñaki Errazkinen ondoan, halaxe mintzo zen iragan apirilean, Espainiako Kontu Auzitegian egin behar zieten epaiketaren atarian. 2013an, Zubietako errauste planta gerarazteko erabakia hartu zutenean, deus okerrik ez zutela egin argudiatu zuen, eta horixe defendatzera joango zirela Madrilera. Eta aldeko epaia lortu dute: euren jarduna egokia izan zela ebatzi du epaileak.

Pozik zegoen atzo Intxaurrandieta. «Erabat konbentzituta geunden; bagenekien ondo jokatu genuela. Eta honek baieztatu besterik ez du egiten hori». Auzibidea oker zitekeen kezka ere izan dute, ordea, hilabeteotan guztiotan. «Izan ere, joko zelaia ez zen gure aldekoa. Auzi politikoa zen, ez juridikoa». Epaileak, baina, arrazoia eman die, eta salatzaileek auzibidetik eratorritako kostuak pagatu beharko dituzte. Ebazpenaren kontra helegitea jar dezakete.

Salaketa aurrera eraman duen GHK Gipuzkoako Hondakinen Kontsortzioak adierazi du epaia errespetatzen duela, baina bere esku dauden «bitarteko guztiak» erabiliko dituela «Gipuzkoak berreskuratu dezan EH Bilduko aurreko kudeatzaileek eragindako 45 milioi euroko zorra». Aurreratu du GHK-ko zerbitzu juridikoak aukera guztiak aztertzen ari direla, «interes publikoa babesteko eta eragindako kaltea gutxitzeko», eta adierazi du EAEko Auzitegi Nagusian prozedura bat irekita dagoela GHK-ko aurreko kudeatzaileen jokabidean irregulartasunak eta botere desbideratzea izan ote ziren ikertzea eskatzeko. Auzitegi Gorenaren oniritziaren zain dago auzibide hori, GHK-k dioenez.

EH Bilduk foru aldundian agintean egin zuen legealdian hartu zuten orduko GHK-ko buruek errauste plantako lanak gerarazteko erabakia. Aldi hartan, GHK-ko presidentea zen Intxaurrandieta; Iñaki Errazkin, berriz, Ingurumen diputatua. Biek eman zuten erabakiaren berri 2013ko azaroan. Erabaki hori okerra izan zela salatu zuten EAJko eta PSE-EEko buruzagiek, eta, legealdi honetan, foru gobernuko agintea berreskuratuta, EH Bilduko buruzagi ohiak auzitara eramatea ebatzi dute; erabakiak diru galerak ekarri dituela adierazi dute, eta arduradun politikoek horren gaineko erantzukizuna hartu behar dutela. Eta «erantzuna» zinetan larria izan zitekeen. Kontu Auzitegiak auzipetuen aurkako ebazpena eman izan balu, 46 milioi eurorainoko zigorra jar ziezaieketen biei.

Auzibide horren atzean «mendeku» gosea besterik ez zegoela azaldu dute usu bi auzipetuek. «Halakoak eremu juridikora eramaten badira, eramaten dira adierazteko zeinek agintzen duen eta zeinek egon behar duen mendean», deitoratu zuen Errazkinek epaiketaren atarian egindako agerraldi batean.

Aukera «bakarra» zen

Kritika horiei kontra eginda, bi buruzagiek benetan kudeaketa txarra egin zutela argudiatzen saiatu dira, hala ere, partzuergoko egungo buruzagiak. Madrilen egin zuten epaiketan izan zen Jose Ignacio Asensio Ingurumen diputatua, eta irmo mintzatu zen han ere EH Bilduko kideen jarreraren kontra. «Botere desbideraketa oso larria izan zen. Oso gutxitan gertatzen da, zorionez. Baina kasu honetan gertatu zen, eta horrek kalte ekonomiko handia ekarri zuen», argudiatu zuen.

Bi auzipetuek, beste askotan bezalaxe, hartutako erabakiaren alde egin zuten tinko epaiketan ere. Errauste planta, haiek agintea hartu aurreko legealdian pentsatu eta ebatzi zen moduan, ezin zela egin argudiatu zuten. «Aukera guztiak aztertu genituen. Une hartan genuen aukera bakarra kontratua etetea zen», adierazi zuen Intxaurrandietak. Antzera Errazkin ere: «Errauste planta egin izan balitz, guztiz defizitarioa izango litzateke».

Espainiako Kontu Auzitegiak arrazoia eman die: egoki jokatu zutela ebatzi du. Gaur eguerdian, EH Bilduk agerraldi bat egingo du, epaiaren gaineko balorazioa jakinarazteko.

Etorkizunez betetako arma

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna