Koronabirusa

Azkoien, ia bakartuta

Bihartik, ezinbesteko arrazoiengatik ez bada, ezingo da herrian sartu edo irten. Edukiera erdira jaitsiko dute, eta tabernak 22:00etan itxiko dituzte
Azkoienen lasaitasuna zen nagusi atzo.
Azkoienen lasaitasuna zen nagusi atzo. IÑIGO URIZ / FOKU Tamaina handiagoan ikusi

Joxerra Senar -

2020ko irailak 23

Bihar gauerditik, bigarren fasean izango da Azkoien, berritasun berezi batekin: ezin izango da herritik sartu edo irten, salbuespeneko arrazoiekin izan ezik, eta foruzainek zein guardia zibilek kontrolatuko dituzte errepideak. Udalarekin hitzartuta, Nafarroako Gobernuak foru agindu bat onartu du, hainbat neurri murriztaile ezartzeko. Batetik, ostalaritzarekin lotutakoak: 22:00etarako itxi beharko dituzte ateak, edukiera erdira murriztuko da, eta gehienez sei lagun zerbitza daitezke. Ostalaritzak ez ezik, saltokiek eta bestelako negozioek ere pertsona kopurua erdira murriztuko dute. Gainera, kiroldegi, kultur etxe eta eraikin publikoak itxi egingo dira.

Neurri horiek atzo iluntzean azaldu zituen gobernuak, eta horien edukia zehatz-mehatz jakin aurretik, Juan Carlos Castillo alkateak arduraz jokatzeko deia egin zien herritarrei, konfinamenduaren aukera mahai gainean dagoela ohartaraziz. «Bide horretatik goaz, tamalez». Izan ere, eskualdeko gainerako herrietan bezala, zabaltzen ari da koronabirusa, eta azken lau egunetan ehundik gora positibo atzeman dituzte: herenegun soilik 32 detektatu ziren —100.000 biztanleko 1.700 positiboko tasa da hori—.

Neurri guztiak guztiz ezagutu aurretik, atzerapauso horren aurrean, kezka nabari zen Azkoiengo herritarren artean. Luis Frances pentsiodunak, adibidez, «zentzuzkotzat» jo zituen neurriak. «Egoerak kezkatu egiten gaitu. Biloba dugu etxean konfinatuta, eta, azkenean, kokoteraino eginda gaude honekin guztiarekin», esan zuen gogaitu keinua eginez.

Bere larrian, «normala»

Felix Eskirotzen ustez, filosofiaz hartu behar da egoera, bere berezian normala delako gertatzen ari dena. «Jendea harritu egiten da, asaldatu eta izutu, baina azkenean toki guztietan gertatuko da. Ez dakit eguraldi aldaketa den edo zer... Ez dakigu nondik datorren piztiatxo hori, nola hartzen den». Konfinamenduaren itzala nabari da herrian:. «Pozik egon gaitezke estatua ixten ez badute. Ez dute egingo ezin dutelako egin».

Kasuen igoeraren zergatia hizpide da herrian. Normalean festak irail hasieran izaten dira, eta ofizialki jairik izan ez bazen ere, egun horietan festa giroa izan zen herrian. Akelarre tabernako Aritz Eskirotzek egun horietan itxi egin zuen ostatua, «zer zetorren ikusirik». Dena den, haren ustez, debekuak eta murrizketak ez dira konponbidea, arazoa baizik. «Etxetik atera ginenetik banekien irailerako edo urrirako berriro itxita egongo ginela». Haren arabera, gizartearen funtsetako bat sozializazioa da, eta logikoa da jendearen jarrera. «Horren aurrean, konponbideak eman ordez, kriminalizatu egiten da». Eskirotzen irudiko, «normala ez dena da maskarak eramatea eta neurriak hartuta kasuek gora egitea». Ohartarazi du neurri gogorrek ustez lortu nahi duten helburuaren kontrakoa ekartzen dutela: «Terrazetan jendea kontrolatuta dago; aire zabalean, eta udan, ordutegia zabaldu ordez, murrizketak ezarri dituzte. Zer lortu dute? Jendea lagun eta familia giroan biltzea, toki itxietan. Egin behar denaren kontrakoa».

Kontrara, izenik ematea nahiago ez duen emakume talde batek nabarmendu du isunak garaiz ez jartzea dela arazoa. «Festak edo ez-festak direla, hor ibili dira udan musika ekitaldiak eta bestelakoak prestatzen, baina zertarako? Gastatu zezaketen diru hori beste edozertan».

Ana Francesek kiroldegiko atarian egiten du lan, eta atzo arratsaldean ez zioten oraindik jakinarazi itxiko zutela. «Kiroldegian, neurriak zorrotz betetzen ditugu, eta erabiltzaileei irizpideak ondo azaldu. Baina kulparik ez duenak ere ordainduko du orain...». Haren ustez, Azkoienen, oro har, zera gertatu da: herritar guztiek bete behar lituzketela administrazioak ezarritako irizpideak, baina denek ez dutela jaramon egin.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Durango, atzo arratsaldean. Dena itxi behar dute 21:00etatik aurrera. ©Aritz Loiola / FOKU

Alarma egoera ezartzea erabakiko du gaur Espainiako Gobernuak

Edu Lartzanguren

Ministroen Kontseilu berezia egingo dute gaur dekretua sinatzeko, besteak beste Hego Euskal Herriko gobernuburuek eskatuta.

 ©JON URBE / FOKU

«Onartezina da bihar txertoa heltzea eta horretaz gogoetarik egin gabe egotea»

Arantxa Iraola

Txertoa lortzeko ikerketek, hura jartzeko garaia heltzen denerako ezarri behar diren irizpideek, itaun etiko ugari ekarri dituzte. Horietaz gogoetan ari da Ausin, eta, oro har, izurriaren inguruko auzi etikoez. Hitz hau darabil usuenik: «Gardentasuna».

Jaten emateko lizentziarik ez duten ostatuetako bat, Maulen, estadioaren parean, halabeharrez hetsirik. ©GUILLAUME FAUVEAU

Etxeratze aginduak ez du karismarik

Ainize Madariaga

COVID-19ren kontrako manuek ezinegona eragin dute hainbat herritarren artean. Hiru ostatuk ezin dute ireki Maulen. Zabal dezaketenek ez dakite norat buruz doazen

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna