Albistea entzun

Ahetzen egin nahi duten luxuzko etxebizitza proiektu bat salatu du EH Baik

Laborantza lurrak desagerrarazi eta bigarren etxebizitzak eraikiko dituztela salatu dute. Apirilean onartuko dute Bizitegien Tokiko Plana.

EH Baiko kideen prentsaurrekoa Ahetzen, atzo.
EH Baiko kideen prentsaurrekoa Ahetzen, atzo. BERRIA Tamaina handiagoan ikusi

Ekhi Erremundegi Beloki -

2021eko martxoak 4

Lur saldua, betiko galdua dio erran zaharrak. Arrisku hori ikusten du EH Baik, Ahetzen (Lapurdi) egin nahi duten etxebizitza proiektuan. Gaur egun laborantzarako diren lurretan etxaldea bota eta luxuzko hamar etxe eraikitzeko proiektua du sustatzaile pribatu batek. «Ez da dudarik, bigarren etxebizitzak izanen dira», deitoratu du EH Baik, eta Euskal Hirigune Elkargoan lantzen ari diren Bizitegien Tokiko Planaren eztabaidan kokatu du.

Lapurdiko etxe zaharren itxura du Larre Luzea etxaldeak. Gaur egun ez da inor bizi, eta egoera txarrean da eraikina. Inguruko lurrak laborantza jardueretarako erabiliak dira, baina azken urteetan eraikigarri bilakatu dituzte horietako batzuk, 2019ko uztailean onartu zuten hirigintza planaren bidez. Lurren zati batean ofiziale eremu bat sortu nahi dute, eta etxaldeari sailkapena aldatzeko aukera ere aurreikusi zuten.

Lurren jabeak etxaldea sustatzaile bati saldu nahi dio, eta horrek eraikitzeko baimena eskatu dio herriko etxeari. Atzo zen biltzekoa Natura, laborantza eta oihan eremuen babesteko departamendu batzordea, Pauen (Biarno), etxaldearen eremua eraikigarri bilakatu ala ez erabakitzeko. «Hemen den laboraria jadanik mehatxatua da ofiziale eremuaren proiektuarekin; orain, bigarren eraso zuzena du. Proiektuak aitzina egiten badu, laborantza jarduerak ez du irauten ahalko hemen», azaldu du Nikolas Blain EH Baiko kideak. Lurrak ustiatzen dituen laborariaren seme bat ikasketak bukatzen ari da, eta segida hartzeko gogoa luke, bertan bizitzeko proiektuarekin.

Elkargoan eztabaida

Azken urteetan gisa horretako proiektu andana izan dira Ipar Euskal Herrian, eta eragile batek baino gehiagok salatu izan du laborantza lurren desagerpena. Arazo hori azpimarratu du Euskal Hirigune Elkargoan lantzen ari diren Bizitegien Tokiko Planak ere. «Diagnostiko oso bat egin da; lehen aldia da horrelako argazki zehatza dugula. Bagenekien egoera larria bizi dugula, baina datu objektiboei begiratuta, bada beldurtzekoa. Merkatu libreak eragiten dituen ondorio sozial eta ekologikoak onartezinak dira», salatu du Blainek.

Udazkenetik ekarpenak egiten ari dira herriko etxeak. Diagnostikoarekin gehienek bat egiten badute ere, gauzapenari buruz kritika zorrotzak agertu dituzte batzuek. Ondoko asteetan EH Baik iritzia emanen du gaiaz. Ekarpenak kontuan hartuta, apirilean izanen da lehen bozka elkargoan, eta udazkenean behin betikoa. Bizitegien arloan Lapurdin, Nafarroa Beheran eta Zuberoan ondoko sei urteetan izanen den estrategia ezarriko du dokumentuak.

Iazko abenduan, higiezinen agentzia baten aitzinean bildu ziren EH Baiko kideak, Angelun (Lapurdi), hark zabaldutako iragarki bat salatzeko. «Lurra eta etxebizitzaren arazoa konpontzeko erantzun kolektiboak beharrezkoak direla azpimarratu genuen, bakoitzak hartu beharko zituela bere ardurak: promotoreek, agentziek, etxe egileek, baina baita tokiko hautetsiek ere, herrietan, elkargoan edo Frantziako Asanblean», ohartarazi du Blainek. «Denak dira arduradun, edo, hobeki erran, denek dute erantzukizun bat».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Ikasmahaia bizkarrean hartuta

Ikasmahaia bizkarrean hartuta

Iker Tubia - Nafarroako Hitza

Iruñeko Udal Ikastolaren memoria osatu dute ikastetxeen eta norbanakoen ekarpenei esker. Jasotako dokumentu, argazki eta heziketa material guzia Nafarroako Artxibo Garaikidean ari dira gordetzen.

Astra Zenecaren txerto dosiak. ©LESZEK SZYMANSKI / EFE
Lazkaoko (Gipuzkoa) baheketako irudi bat, martxoaren amaierakoa. ©Jon Urbe / Foku

Gero eta paziente gehiago daude ZIUetan

Berria

Otsailaren 23tik COVID-19aren ondorioz ZIUetan dagoen paziente kopururik handiena erregistratu dute: 158 lagun. Beste 967 positibo atzeman dituzte Hegoaldean.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna