Euskara eskakizuna ezarri du Nafarroako Gobernuak 55 funtzionario postutan

Batez ere, osasun arloko lanpostuei ezarri diete profil linguistikoa. PPk neurria kritikatu du: «Euskaldunez kolonizatu nahi dute administrazioa»
Mediku euskaldunak eskatzeko protesta bat, Iruñean.
Mediku euskaldunak eskatzeko protesta bat, Iruñean. IÑIGO URIZ / FOKU

Ion Orzaiz -

2018ko abenduak 7
Urrats txiki bat egin du Nafarroako Gobernuak euskara administrazioan arautzen duen foru dekretua aplikatzen hasteko. Lantalde organikoko zenbait lanposturen hizkuntza profila zehaztu du dekretu bidez, eta, hortaz, euskara eskakizun izanen da aurrerantzean administrazioko 55 postu gehiagotan. Abenduaren 5eko Nafarroako Aldizkari Ofizialean argitaratu zen neurria, eta, atzotik, indarrean dago.

Lanpostu elebidun berri gehienak lantalde organikoan zeuden lehendik ere, baina hizkuntza eskakizuna aldatu diete. Osasun Departamentukoak dira gehienak: erizain espezialista lanpostu bat Nafarroako Osasun Publikoaren Instituturako; zazpi mediku Altsasuko, Etxarri Aranazko, Iturramako, Arrotxapeko, Txantreako eta Tafallako osasun etxeetan aritzeko; larrialdietako bi mediku Iruñeko Ospitalez kanpoko Larrialdien Zerbitzurako; odontologo bat; 12 erizain Altsasuko, Burlatako, Buztintxuriko, Elizondoko, Ermitagañako, Irurtzungo, Izabako, Arrotxapeko, Sanduzelaiko, Donibaneko, Sarrigurengo eta Txantreako osasun etxeetarako; hamar erizain eta bi hezitzaile Nafarroako Ospitale Gunerako; eta, azkenik, beste sei lanpostu (bi psikologo, hiru erizain eta terapeuta bat) osasun mentaleko zerbitzuan aritzeko.

Beste departamentuei dagokionez, zortzi suhiltzaile lanpostutan ezarriko dute euskara eskakizuna, eta lau foruzain postu berri sortuko dituzte, B2ko profil linguistikoarekin. Nafarroako Zerga Ogasunean, kudeatzaile eta ikertzaile laguntzaile postu bati ezarri diote hizkuntza eskakizun berria; Unibertsitateen Zuzendaritza Nagusian, bi informatikari lanpostutan; eta Kultura Zuzendaritza nagusian, azkenik, liburutegiko arduradun postu batean ezarri dute.

Lantalde organikoko postu batzuetan euskara eskakizunak txertatzeko erabakiak hautsak harrotu ditu Nafarroako PPren egoitzan. Aldaketak «isilka eta azpikeriaz» egin izana kritikatu du alderdiko buru Ana Beltranek —euskararen foru dekretua 2017ko azarotik dago indarrean—, eta neurriak ekarriko duen «diskriminazioa» salatu du: «Gaur egun postu horietan dauden behin-behineko langile elebakarrek lanpostua utzi beharko dute, euskaraz dakitenen mesedetan. Hau guztia estrategia bat da, administrazio publikoa euskaldunekin kolonizatzeko».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna