Migratzaile kopuruaren arabera «egokituko» dira baliabide publikoak

Aste honetan irekitako 48 lekuko aterpetxean, ohea, dutxa eta jana eskainiko dira. OEE plataformak uste du «benetako harrera» falta dela
OEE plataformak atzo goizean egindako elkarretaratzea.
OEE plataformak atzo goizean egindako elkarretaratzea. JUNE PRIETO / FOKU

Ibai Maruri Bilbao -

2018ko uztailak 6
Zehaztu gabe dago guztia. Eusko Jaurlaritzako Giza Eskubide, Bizikidetza eta Kooperazio Zuzendaritza, Bizkaiko Foru Aldundiko Enplegu, Inklusio eta Berdintasun Saila eta Bilboko Udala bildu egin ziren herenegun iluntzean, azken asteetan Bilbora iritsi diren migratzaileei zer harrera egin zehazteko. Berri agentzien arabera, joan den asteburutik martxan dagoen 48 oheko aterpetxeari eustea eta 40ko beste bat zabaltzea adostu zuten. Gurutze Gorriaren esku geratuko da baliabide horiek kudeatzea. Hiru erakundeek 150.000 euroren laguntza emango diote horretarako. Baina Teresa Laespada Bizkaiko Enplegu, Inklusio eta Berdintasun diputatuak zehaztu du etorriko diren migratzaileen kopuruak baldintzatuko duela bigarren hori martxan jartzea. «Ez dakigu zer etorriko den; beraz, ez dugu sortuko agian beharko ez dugun zerbait».

Diputatuaren arabera, erakunde publikoek «tamainako» erantzuna eman dute. «Duela hamabost egun hasi ginen igartzen ohi baino migratzaile gehiago etorri direla, eta bi aste hauetan dispositibo bat ipini dugu martxan ezerezetik». 48 lagunentzako lekua duen egoitza horretan, lotarako ohea, dutxatzeko aukera eta jatekoa emango dizkiete migratzaileei.

OEE Ongi Etorri Errefuxiatuak plataformak bigarren elkarretaratzea egin zuen atzo. Udaletxearen parean, baliabide falta salatu zuten dozenaka lagunek. Auzitan ipini dute egindakoa: benetako harrera falta dela uste dute. «Zabaldu duten egoitza horretan, soilik bi gau igaro ditzakete. Bart [asteazken gauean] 38 pertsonari utzi zieten lo egiten, eta 35 kanpoan geratu ziren, birritan erabili dutelako aterpetxea. Boluntarioek bilatu behar izan genien lotarako lekua».

Laespadak gaitzetsi egin ditu kritikak. Uste du «iritzi politikoak» direla. Baina aitortu du eskainiko den harrera 48 ordukoa izango dela, «Europara bidean atseden har dezaten». Printzipioz, udarako behar duten aurrekontua adostu dute.

Juan Mari Aburto alkateak «Gurutze Gorriari bere beharra egiten uzteko eta migrazio prozesuak ez oztopatzeko» eskatu dio OEE plataformari. Handik erantzun diote «pozarren» lagako diotela migratzaileak laguntzeari «administrazioak bere lana egiten badu». Bartzelona eta Madril bezala, Bilbo «benetako harrera hiri» izatea gura du OEEk.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna