Bost pertsona atxilotu zituzten atzo Gasteizko Gaztetxean. Berehala zabaldu zen atzo goizean berri hori. Efe albistea agentziaren arabera, hainbat auzok bertan sortzen ari ziren zarataren harira protesta egin zuten, eta hori izan zen atxiloketak ekarri zituen operazioaren zioa. Gaztetxe barrutik, gainera, hainbat objektu jaurti zizkietela azaldu zuten udaltzainek, eta ertzainen laguntza behar izan zutela. Azaldu zuten hala ere gazteak oldartu egin zirela, eta zauriak eragin zizkietela hainbat poliziari. Eusko Jaurlaritzako Segurtasun Sailak jakinarazi zuen, hain justu, bi ertzainek osasun arta behar izan zutela.
Gazte Asanbladak gertaeraren gaineko «xehetasunak» biltzen ari zela adierazi zuen atzo ohar baten bitartez, baina lehen gogoeta bat plazaratu zuen: «Indar errepresiboek salbuespenezko jarrera dute herri mugimenduko espazioen aurka». Gazteek gezurtatu egin nahi izan zuten, gainera, albistearen zati bat: «Hainbat hedabidek aditzera eman duten arren, gure gaztetxea ez dute hutsarazi». Bide batez, poliziek kolpeka eta borrekin zauritu dituzten gazteen irudiak ere zabaldu ziren atzo sare sozialetan, eta haien portaera bortitza agerian utzi nahi izan zuten testigantza horietan.
Kritikak eragin ditu albisteak. EH Bilduko Arabako Batzar Nagusietako eledun Kike Fernandez de Pinedok, adibidez, adierazi du Poliziaren «probokazio» baten itxura izan zuela gertatutakoak: «Zentzuzko erabakitik gutxi eta probokaziotik asko dauka».
Gasteizko Gaztetxean bost pertsona atxilotu dituzte
Gazte Asanbladak Polizia kritikatu du: «Salbuespenezko jarrera dute herri mugimenduko espazioen aurka». Ez dute eraikina «hutsarazi»
Iruzkinak
Ez dago iruzkinik
Ordenatu