Albistea entzun

Bateragune auzia

'Bateraguneko' defentsak Gorenaren baimena du epaiaren berraztertze helegitea aurkezteko

Bi asteko epea dauka eta Espainiako auzitegi haren epaia baliogabetzeko eskatuko du. Otegi inhabilitatuta dago 2021eko otsaila arte.
<em>Bateragune auziko</em> auzipetuak, 2011ko ekainaren 27an, Espainiako Auzitegi Nazionalean, epaiketan.
Bateragune auziko auzipetuak, 2011ko ekainaren 27an, Espainiako Auzitegi Nazionalean, epaiketan. ANGEL DIAZ / EFE Tamaina handiagoan ikusi

Enekoitz Esnaola -

2019ko azaroak 16

Espainiako Auzitegi Gorenak Bateragune auziko epaiaren berraztertze helegitea aurkezteko baimena eman dio defentsari; beraz, aukera egongo da Gorenak auziaz 2012an emandako sententzia bertan behera geratzeko, eta, horrela, Arnaldo Otegiren inhabilitazioa baliogabetzeko. Hori eskatuko du defentsak. Atzo jakinarazi zuen autoa Gorenak, eta defentsa abokatuek bi asteko epea dute berraztertze helegitea aurkezteko, han. Gorenak fiskaltzari igorriko dio defentsaren idatzia, eta ondoren erabaki egingo du. Ez dauka epe jakin bat jakinarazpena emateko, baina defentsak uste du azkar egin ahal dela.

Europaren ebazpen batek behartuta aztertuko du Gorenak 2012ko maiatzaren 7an Bateragune auzian eman zuen epaia. Iazko azaroaren 6an, Giza Eskubideen Europako Auzitegiak ebatzi zuen auzikoek ez zutela epaiketa justua izan Auzitegi Nazionalean (2011), Angela Murillo epailea ez zelako «inpartziala» izan. Estatuaren Abokatuak ez zuen Estrasburgoren sententziaren aurka helegiterik aurkeztu, eta Europaren ebazpena aurtengo otsailean bihurtu zen irmo. Orduan, defentsari aukera zabaldu zitzaion Gorenean horren epaiaren berraztertze helegitea aurkezteko, eta apirilean egin zuen baimen eskaera. Fiskaltza helegitea aztertzearen alde agertu zen irailean, eta gaia epaileen esku geratu zen, hil bereko 26an. Gorenak atzo eman zion defentsari helegitea aurkezteko baimena, Manuel Marchena, Julian Sanchez Melgar eta Susana Polo Garcia magistratuen auto baten bitartez.

'Atutxa auziko' aurrekaria

Euskal gatazkari lotuta, berriki izan da antzeko kasu bat, Atutxa auzia deiturikoan, zigortuen aldekoa. Duela bi aste jakin zen Gorenak baliogabe utzi duela Juan Maria Atutxa Eusko Legebiltzarreko Mahaiko presidente ohiari eta Kontxi Bilbao eta Gorka Knörr mahaiko kide izandakoei Sozialista Abertzaleak legebiltzarkide taldea ez desegiteagatik 2008an ezarritako zigorra —aginte judizialari desobeditzea egotzita inhabilitatu egin zituzten—. Baliogabetzearekin Gorenak bide eman dio Giza Eskubideen Europako Auzitegiak 2017an zigor haren aurka erabakitakoari. Estrasburgok ebatzi zuen Atutxaren-eta eskubideak urratu egin zirela haien kontrako epaiketan.

Gorenak autoan azaldu du Europaren epaia nahikoa arrazoi badela berraztertze helegitearen sarrera baimentzeko, Prozedura Kriminaleko Espainiako Legearen 954. artikuluaren arabera. Artikuluak dio helegitea jar daitekeela estatuko epai irmo baten aurka, Estrasburgoko auzitegiak gerora adierazten badu epai horrek Europako Konbentzioa eta bertan jasotako giza eskubideak eta askatasunak urratu dituela, eta kalteek irauten badute —inhabilitazioa— eta ezin badira eten helegitea ez den beste baten bidez.

Bateragune auziko bost zigortuek beteak dituzte kartzela zigorrak, osorik, baina Otegik indarrean dauka inhabilitazioa, 2021eko otsailera artekoa. Eusko Legebiltzarrerako hauteskundeak 2020ko irailean lirateke, epeak betez gero. 2016koetan ezin izan zen aurkeztu inhabilitazioagatik.

2009ko urriaren 13an izan zen Bateragune auziko operazioa. Auzitegi Nazionalak, 2011ko irailean, zigor epaia eman zuen Otegi, Rafa Diez, Miren Zabaleta, Sonia Jacinto eta Arkaitz Rodriguezen aurka, ezker abertzalearen estrategia berria aurrera eramateko ETAren aginduetara ari zirela iritzita. Gorenak epaia berretsi zuen 2012an, espetxe urteak pixka bat gutxituta —inhabilitazioak ez—. Konstituzionalak, 2014an, Gorenaren erabakia ontzat jo zuen. Zabaleta, Jacinto eta Rodriguez 2015eko urriaren 11n geratu ziren libre. Otegi, 2016ko martxoaren 1ean. Diez, 2017ko abuztuaren 17an, aurretik 17 hilabetean baldintzapean aske egon zelako.

Beste ate bat zabalik

Otegiren inhabilitazioaz badago beste ate bat zabalduta Espainiako Estatuan: Konstituzionalak, iazko abenduan, tramiterako onartu zuen Iñigo Iruin abokatuaren babes helegitea. Konstituzionalak jarrera aldatu zuen Europaren azaroko epaiaren ondoren, onartuta ezarri gabe daukala hautagai izatearen «oinarrizko eskubideari» buruzko doktrina. Ez du erabakia emateko eperik.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Juan Alberto Belloch, artxiboko irudi batean. ©Javier Cebollada / EFE

Juan Alberto Belloch: «Galindo, borrokalari antiterrorista bezala, onena zen»

Iosu Alberdi

Justizia eta Barne ministro ohiak adierazi du bera izan zela Galindori jeneral kargua ematea ahalbidetu zuena, nahiz eta jakin atxilotuak torturatzen zituela.

Eba Blanco (erdian), azaroko biltzarrean, idazkari nagusi izendatua izan ondoren. ©JAVIER ZORRILLA / EFE

EAren primarioak errepikatzeko aginduaren aurkako helegiteak aztertuko dituzte

Xabier Martin

Espainiako Auzitegi Gorenak EAren eskaera tramitera onartu du, eta alderdiaren primarioak errepikatzea agindu zuen probintzia auzitegiaren epaia balekoa den ala ez erabakiko du.

Donostiako Renferen geltokia. ©GORKA RUBIO / FOKU

Beste geltoki bat aldiriko trenen transferentziaren lokarria askatzeko

Xabier Martin

Laster egingo dute Gasteizek eta Madrilek aldiriko trenen eskuduntza gerturatuko lukeen bilera

Senpereko herriko etxeko oposizioak ere dimititu egin du

Senpereko herriko etxeko oposizioak ere dimititu egin du

Arantxa Iraola

Urrian hautetsi hainbatek utzi zuten kargua, auzapezaren kudeaketa ereduarekin kritiko

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Hitzen, ekintzen eta errimen eztanda. Herri bat BERRIAren kulturaren plazan. Baliatu udazkenean BERRIAlagun egiteko eskaintza.