Lularekin azkeneraino

PTk Luiz Inacio da Silvaren hautagaitza aurkeztu du Brasilgo Hauteskunde Auzitegi Nazionalean, debeku mehatxuei aurre eginez
Lurrik Gabekoen Mugimenduak Lularen hautagaitzaren alde egin zuen martxa, atzo, Brasilian.
Lurrik Gabekoen Mugimenduak Lularen hautagaitzaren alde egin zuen martxa, atzo, Brasilian. JOEDSON ALVES / EFE

Mikel Rodriguez -

2018ko abuztuak 16
Brasilen atzo bukatu zen heldu den urriaren 7ko presidentetzarako hauteskundeetarako hautagaiak aurkezteko epea. PT Langileen Alderdiak ez du gibelera egin Luiz Inacio da Silva Lula presidente ohi espetxeratua aurkezteko erabakian, eta atzo azken orduan eraman zituen agiriak TSE Hauteskunde Auzitegi Nagusira. PTk bidegabetzat du Lularen egoera, eta aldarrikapen ekitaldi handi bat bihurtu zuen atzo hautagaitzaren izen ematea. Bigarren instantzian zigortuta dago Lula, eta TSEn auzibide bat hasiko da orain, hautagaitza legezkoa den ala ez ebazteko. Fernando Haddad PTren presidenteordetzarako hautagaiak Lula aurkezteko erabakia defendatu zuen atzo. «Ez da legeari desobedientzia egiteko ekintza bat; herriari eta konstituzioari obeditzea da».

MST Lurrik Gabekoen Mugimenduak Lularen aldeko martxa bat antolatu zuen. Joan den ortziralean atera zen hiru hiritatik, eta, herenegun Brasiliara ailegatu ondoren, atzo TSEren egoitzara joan ziren parte hartzaileak. PTko buruzagiek bat egin zuten haiekin. «Alderdia prest dago Lularen askatasunaren eta errugabetasunaren aldeko borrokan jarraitzeko, eta hura berriz ere presidentetzara eramateko, herriaren aldaketa nahia ordezkatzen baitu», adierazi zuen Haddadek.

Lula joan den apirilaren 7tik daukate espetxean, urtarrilean bigarren instantzian hamabi urteko zigorra jaso ondoren. Ustelkeria eta diru garbiketa egotzita kondenatu zuten, Petrobras enpresa publikoari lotutako Lava Jato operazioaren barruan. Lularen eta haren aldekoen ustez, ordea, elite eskuindarraren asmakizun bat dira akusazioak eta prozesu judiziala bera, ezkerra berriz ere boterera ailegatu ez dadin.

Lulak iaz jakinarazi zuen hauteskundeetara aurkeztuko zela, eta inkesta guztietan agertu da garailetzat, alde nabarmenez. Zigorrak eta espetxeratzeak ere ez dute joera hori aldatu. Datafolha etxearen azkenekoaren arabera, Lulak botoen %30 lortuko lituzke urriaren 7an, eta haren gibeletik geldituko litzateke Jair Bolsonaro ultraeskuindarra, %17rekin. Balizko bigarren itzulian, berriz, PTko hautagaiak arazorik gabe irabaziko luke.

Aste batzuetako prozesua

TSEk hiru eguneko epean argitaratuko du zerrenda ofiziala, eta, hori eginda, espero da Lularen hautagaitzari salaketaren bat jarriko diotela, 2010ean ezarritako lege bat urratzen duela argudiatuta —bigarren instantzian zigortutakoei hautagai izatea debekatzen diona—. Hainbat aste iraun dezake prozesuak, TSEk azken erabakia hartu arte. PTk erran du ez duela «B planik», baina hedabide anitzek uste dute badaukala. Debekurik balego, Haddadek hartuko luke Lularen tokia, eta presidenteordetzarako Manuela D'Avila Brasilgo Alderdi Komunistako presidentea aurkeztuko lukete. D'Avilak duela egun batzuk erretiratu zuen presidentetzarako hautagaitza. Inkesten arabera, ordea, Lula gabe PTk hondoa jotzeko arriskua luke —botoen %2 bakarrik ere aurreikusi diote kasu horretan—. Hala ere, debekuak kanpainan sortuko lukeen astinduarekin emaitza ona lortzeko itxaropena luke ezkerreko alderdiak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna