Ibilgailu batek Marten lur hartzea lortu dute

Maiatzaren 5an ekin zion bere bideari Insight ibilgailuak, eta, 300 milioi kilometro baino gehiago egin ostean, atzo iritsi zen Martera. Lur hartzeko behar izan zituen zazpi minutuak «tentsio handikoak» izan ziren AEBetako espazio agentziaren (NASA) operazio zentroetan. Euskal Herrian arratsaldeko 19:53ak zirenean pausatu zen ibilgailua Elysium Planitia (Eliseoko Lautada) deituriko eremuan. Bere egiteko nagusia bi urtez planetaren barne beroa eta lurrikarak neurtzea izango da. Europako espazio agentziak ere (ESA) parte hartzen du misioan, ExoMars orbitagailuarekin.