Hozka hil

Hortz bat utzi dut
epitafio inperialean
gazteluen hegatsean
gotorlekuen kanoi-zuloan.

Hortz bat josi dut
erreginen errezelean
efigie militarrean
harresi bisitatuan
garaipen-arku nekatuan.

Argazki ugariz
ospatu naute,
atrakzio erantsi bat
nintzelakoan.

Horrelaxe joan naiz
edertasun bortitzak
zigilatzen,
geratu naizen arte
hortz bakarrarekin

Hil nahi dut bera
erori aurretik,
hil nahi baitut
hozka eginez.

Etorkizun argitsuren batek
aztarna horiek uler balitza,
huraxe izango da, Pascal,
nire eternitate dohatsua.