Giro ederra, parkean

Udaparkean egitasmoak musika, dantza, zirkua, zinema eta antzerkia eramango ditu Hernaniko Ave Maria parkera. Doakoa izango da
Udaparkean egitasmoaren aurkezpena, Ave Maria parkean.
Udaparkean egitasmoaren aurkezpena, Ave Maria parkean. HERNANIKO UDALA

Mikel Elkoroberezibar Beloki -

2018ko uztailak 18
Bihartik etzidamurako arratsaldeetan hernaniarrek aire librean aisia eskaintza zabal bat izango dute. Hernaniko (Gipuzkoa) Ave Maria parkean Udaparkean egitasmoa aurrera eramango dute hiru egunez, eta hara agertzen direnek musikaz, dantzaz, zirkuaz, zinemaz eta antzerkiaz gozatu ahalko dute. Ekitaldi guztiak aire librean izango dira, eta doan.

Kukai dantza taldeak Topa ikuskizuna parkera egokituko du, etzi, 20:00etan. Normalean, hirietako kale eta plazetan egiten duten dantza ikuskizuna naturaz inguraturik egingo dute. Imanol Jazz taldea ere hantxe izango da: Imanol abeslaria gogoratzeko aukera paregabea. Etzidamu, 22:00etan, egingo dute kontzertua.

Ttipi Ttapa Hernanin esfortzu handirik gabe paseoan ibiliz osasuna hobetzea eta aktibo sentitzea helburu duen jarduera bat da, eta, bihar, Ave Maria parkean bukatuko dute ibilaldia, Euskarabenturako 100 bat gazterekin. Broken Brothers Brass Band talde iruindarra bidelagun izango dute. Euren emanaldiek funk, gospel edota jazz modernoz beteak dira. Ondoren, Ganso: Babo Royal ikuskizuna ikusi ahalko da: ikusi baino ez, hitzik gabea baita. Koban talde donostiarrak ere kontzertua emango du. Trikitia eta swinga uztartzeko helburuz osatutako taldeak, musika elektronikoa ere presente du bere sorkuntza lanetan.

Etzi, Xip Xap talde katalanak parkean ibilbide bat egingo du, txotxongiloz egindako animaliak bidelagun. Gainera, Kukai dantza taldeak Ave Maria parkera egokituko du Topa ikuskizuna, eta naturaren erdian egingo dute dantza. Jarraian, Paddington 2 filma ikusgai izango da. Familia guztiak ikusteko moduko filma da, eta arrakastatsua izan du munduan.

Etzidamu, 20:00etan, Herrialde Katalanetako Emportats taldeak La Trocola Circ zirku emanaldia aurkeztuko du: akrobazia, eskujokoak, musika eta objektuak koordinatuko dituzte, poetika, umorea eta zuzeneko musikarekin batera. Udaparkean egitasmoa amaitzeko, 22:00etan, Imanol Jazz taldeak kontzertua emango du, Loraldian estreinatu ondoren.

Udaparkean

Bihartik etzidamu arte, Hernaniko Ave Maria parkean (Gipuzkoa).

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna