Batxilergora sartzeko araudi berria, D eredukoen kalterako

Irati Urdalleta Lete.
2021eko maiatzaren 27a
00:00
Entzun
Nafarroako Parlamentuko Hezkuntza batzordean EH Bilduren bozeramaile da Bakartxo Ruiz, eta hark salatu du Batxilergoan sartzeko arau berriak kalte egingo diela Tafallatik, Zangozatik edo Pirinioetatik Iruñera joan behar duten D ereduko ikasleei. Azaldu duenez, orain arte, ikasketak euskaraz egin nahi zituzten Tafallako eta Zangozako ikasleek aukera zuten Batxilergoa Iruñeko D ereduko Iturrama ikastetxean egiteko, eta bertaraino autobusa zuten; orain, berriz, Nafarroako Gobernuak araudia aldatu duenez, ikasle horiek ez dira agertuko Iruñeko ikastetxeen eragin eremuetan, ez dute punturik lortuko, eta haien aurretik geratuko dira Iruñerriko ikasle guztiak, haiek beste ikastetxe bat ere bermatuta izan arren.

Pirinioetako ikasleen kasuan, berriz, Ruizek azpimarratu duenez, orain arte aukera zuten izena ematen zuten ikastetxearen helbidea ikaslearen helbide gisa jartzeko, baina eskola mapa berriak institutu atxiki bakarra izatea eragiten du, eta ezingo dute ikastetxea «irisgarritasunaren arabera» aukeratu.

Arte Batxilergoan, arazoak

Araudi berriak Arte Batxilergoan «disfuntzio batzuk» agerian jarri dituela ere uste du Ruizek. Zehazki, Arte Plastikoetako eta Arte Eszenikoetako Batxilergoez aritu da. Nafarroa osoan soilik Iturrama institutuak eskaintzen du lehenengoa euskaraz. «Orain arte, Nafarroa osoko ikasleei baimena ematen zitzaien ikastetxeko helbidea ikaslearen helbide gisa ager zedin; beraz, guztiek aukera berberak zituzten onarpen prozesuan, baina hemendik aurrera ez da horrelakorik gertatuko». Antzekoa gertatzen da Arte Eszenikoetako Batxilergoarekin. «Bi kasuetan, Iruñerritik kanpoko ikasleek zero puntu izanen dituzte; Iruñerrikoek, aldiz, hiru puntu». Hezkuntza Departamentuari «irtenbide bat» eskatu dio, «ikasle horiek diskriminaziorik jasan ez dezaten»; eta Hezkuntza kontseilariarentzat galdera bat erregistratu dute.
Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.