Bi gizon atxilotu dituzte, bata Algortan eta bestea Donostian, sexu eraso bana egotzita

Epaileek baldintzapean aske utzi dituzte bi erasotzaileak. Beltran de Herediak adierazi du ezin dela esan sexu erasoak ugaritu direnik.

Donostiako udalbatzarraren elkarrateratzea, sexu erasoak salatzeko.
Donostiako udalbatzarraren elkarrateratzea, sexu erasoak salatzeko. J. URBE / FOKU

Laida Goiburu Agirre -

2019ko abuztuak 13

Ertzaintzak bi gizon atxilotu ditu, sexu eraso bana leporatuta; bata, Algortan (Bizkaia), eta bestea, Donostian. Ostiral gauean izan zen Algortako erasoa; etxebizitza batean adingabe bati sexu erasoa egitea egotzita atxilotu zuten gizonezko bat, larunbatean, goizeko 05:30 inguruan, eta emakumea Gurutzetako ospitalera eraman zuten, arta zezaten. Atzo goizean, erasotzailea epaitegira eraman zuten, eta epaileak erabaki zuen baldintzapean aske uztea. Getxoko Udalak erasoa salatzeko elkarretaratzea egingo du gaur, 19:30ean.

Donostiako erasoa, berriz, Aste Nagusia hasi baino ordu batzuk lehenago izan zen; larunbatean, 01:30 aldera. Gizon bat emakume bati ukituak egiten saiatu zen, andre horri eta harekin zegoen lagunari kalean oldartuta. Salaketa jarri zuten, eta ordu batzuk geroago atxilotu egin zuten gizona. Larunbat arratsaldean epaitegira eraman zuten, eta epaileak baldintzapean aske uzti zuen. Donostiako Udalak gaitzetsi egin du erasoa, eta esan du istilua «Aste Nagusitik at» jazo dela; adierazi du jarrera horiek «emakumearen askatasuna eta duintasuna» gutxiesten dituztela.

Azken asteetako gertakarien harira, Estefania Beltran de HerediaEusko Jaurlaritzako Segurtasun sailburuak adierazi du ezin dela esan aurten sexu erasoak ugaritu egin direnik, eta azpimarratu du herritarren «kontzientziazioa» handiagoa dela halakoak salatzeko orduan.

Bilboko konpartsek, bestalde, agerraldi bat egin zuten atzo, erasorik gabeko jaiak nahi dituztela adierazteko: «Urteak daramatzagu erasorik gabeko jaigune bat eraikitzeko lanean, gozamena, errespetua eta elkarzaintza nagusitu daitezen».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna