Noiz sortua: 2020-01-17 00:30:00

Paris 365 jantokiak itxieraren mamua uxatzea lortu du, 70.000 euro bilduta

Abenduan, Gizakia Herritar fundazioak abian jarri zuen 'SOS Paris 365' kanpaina, proiektuaren bideragarritasun ekonomikoa bermatzeko
Paris 365 jantoki solidarioaren ataria.
Paris 365 jantoki solidarioaren ataria. ENDIKA PORTILLO / FOKU Tamaina handiagoan ikusi

Ion Orzaiz -

2020ko urtarrilak 17
Desagertzeko zorian egon da Iruñeko Paris 365 jantoki soziala. 100.000 euroren zorra pilatua zuen, eta hura kitatzeko epemuga gero eta hurbilago zegoen: 2020ko urtarrilerako pagatu behar zuen diru kopuru horren zatirik handiena. Hori dela eta, jantokia kudeatzen duen Gizakia Herritar fundazioak abian jarri zuen SOS Paris 365 lelodun kanpaina, herritarren babesa jasotzeko. Ordaintzeko epea amaitzear zela, fundazioko arduradunek jakinarazi dute kanpainak berebiziko arrakasta izan duela, 70.000 euro jaso dituztelako hilabete honetan. Jantokia salbatzea lortuko dute laguntza horri esker.

Jantoki sozialeko kideek azaldu dutenez, diru ekarpen gehienak norbanakoenak izan dira: 10 eta 3.000 euroren artekoak. Baliteke bildutako dirua gehiago izatea ere, zenbatzeko baitituzte oraindik elkarte, fundazio, lantoki eta bestelakoen ekarpen ekonomikoak.

2008. urtean eztanda egin zuen krisi ekonomikoak eragindako larrialdiari erantzuteko jarri zuten martxan Paris 365 jantoki solidarioa, 2009. urtean. Hamar urteotan, 278.000 gosari, bazkari eta afari baino gehiago banatu dizkiete Gizakia Herritar fundazioko kideek jantokiko erabiltzaileei, Jarauta karrikan hasieran eta Descalzosen orain. Gainera, 10.250 elikagai saski baino gehiago banatu dituzte.

Batetik, Gizakia Herritar fundazioko kideek 1.700 boluntario baino gehiago izan dituzte laguntzen hori guztia lortzeko; bertzetik, 500 bazkideren baino gehiagoren babesa lortu du egitasmoak. Proiektua garatuz joan da, gainera, eta jantoki gisa sortutakoari hamaika adar atera zaizkio gero: Paris 365 Txokoa, sukaldea, bigarren eskuko arropa saltzeko dendak eta haurrentzako ludoteka, bertzeak bertze.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna