Zallako (Bizkaia) Zaldibar Argitu plataformak ez du ahaztu nahi Alberto Sololuzek eta Joaquin Beltranek —azken hori, Zallako herrikidea desagerturik jarraitzen dutela, joan den otsailaren 6an Verter Recycling 2002 SM enpresak Zaldibarren (Bizkaia) zuen hondakindegia maldan behera amildu zenetik. Koronabirusaren krisiak ekarritako larrialdi egoerak ezinezko egiten du bestelako mobilizaziorik antolatzea, eta horregatik erabaki dute konfinamenduak iraun bitartean ostegunero protesta balkoi eta leihoetara eramango dutela. Atzo, osteguna izaki, berriro ere egin zuten Sololuze eta Beltranen aldeko aldarria.
Zallako plataformak antolatzen du protestaldia, baina beste zenbait herritako Zaldibar Argitu plataformek ere bat egin dute deialdiarekin. Kartelak, marrazkiak eta antzekoak jarri zituzten leiho eta balkoietan, Zaldibarko zabortegiaren auzia argi dadin eta desagertutako bi langileen bila jarrai dezaten galdegiteko.
50 egun bete dira Zaldibarko hondakindegian luizia gertatu eta Sololuze eta Beltran zaborren azpian lurperaturik geratu zirenetik. Bilaketa lanek «bide onean» jarraitzen dute, Eusko Jaurlaritzaren esanetan, baina oraingoz ez dute emaitzarik izan.
Zaldibar Argitu herri plataformak Sololuze eta Beltran gogora ekarri ditu
Afixak eta marrazkiak jarri dituzte balkoi eta leihoetan, Zaldibarko auzia argi dadila eskatzeko. 50 egun bete dira zabortegia amildu zenetik
Iruzkinak
Ez dago iruzkinik
Ordenatu