Clara Ponsati aske utzi du Eskoziak, kautelazko neurriak jarrita

Atzo, Edinburgoko auzitegi batek Clara Ponsati galdekatu zuen, eta aske uztea erabaki du. Kautelazko neurriak ezarri dizkio Kataluniako Gobernuko Irakaskuntza kontseilari ohiari, eta pasaportea kendu dio. Kataluniako prozesu subiranistaren harira, auzipetuari matxinada eta diru publikoaren erabilera okerra delituak leporatu dizkiote, eta Espainiako Auzitegi Gorenak haren kontrako euroagindua ezarri zuen joan den ostiralean. Eskoziako justiziak aurrerago erabakiko du estradizioaz: Ponsati apirilaren 12an edo 18an da berriro deklaratzekoa.

Haren abokatuak, Aamer Anwarrek, esana zuen Ponsati justiziari laguntzeko prest zegoela, eta kontseilari ohiak 11:30ean jo zuen komisaria batera. Arratsaldean deklaratu zuen. Anwarrek jakinarazi zuen argudiatu zuela Espainian ez duela epaiketa justurik edukiko, eta bere ideia politikoengatik ari dela jazarria izaten. Ponsati Belgikara erbesteratu zen pasa den urri bukaeran, eta Eskozian zegoen martxo hasieratik, Saint Andrewsko unibertsitatean eskolak ematen.

SNP alderdia dago boterean Eskozian, eta Kataluniako indar subiranisten asmoak sostengatu izan ditu, autodeterminazio prozesua babestuz. Ponsatiren kontrako euroagindua dela eta, Espainiako Gobernuak han duen enbaxadoreari kexatu zaio, eta, gainera, kontseilari ohiaren egoera salatu du Europako Kontseiluan. Nicola Sturgeon lehen ministroa Espainiako Estatuak hartutako erabakiaren aurka dago, baina adierazi du errespetatu egingo duela justiziak erabakitakoa.

Bestalde, Suitzako justiziak Espainiako agintariei jakinarazi die ez duela tramitatuko Anna Gabrielen kontrako euroagindua, leporatzen dioten delitua «politikoa» iruditzen zaiolako.