Milaka erle hil dira Angelun: «Egun batetik bestera erle metak topatu ditut»

30 erlauntz suntsitu dira Angelun, eta jabeak uste du intoxikatu egin direla. Zer gertatu den aztertzen ari dira departamentuko albaitariak
Jacques Sallesen erlauntzetako bat, hildako erle metarekin.
Jacques Sallesen erlauntzetako bat, hildako erle metarekin. BERRIA

Ekhi Erremundegi Beloki -

2018ko urriak 31
Urtebeteko lana galdu du Jacques Sallesek. Ezin zuen ikusitakoa sinetsi orain dela bi aste Angeluko Brindos auzoan (Lapurdi) duen erlategira joan zenean: «Egun batetik bestera, erle metak aurkitu nituen erlauntz kanpoan eta barnean: hilik». Intsektizidek sortutako arazo bat dela dio. «Hotzaren, gosearen edo beste arrazoi baten ondorioz hiltzen direlarik, pixkanaka hiltzen dira. Denak batera hil dira, egun bakarrean», kontatu du, haserre. «Lehen erlauntzean, denak hilak; ondokoan, batzuk dardarka, eta beste batzuk, buruz gora, euliei pozoia botatzen zaienean bezala», azaldu du. Erlauntz bakarra gelditzen zaio bizirik, «irauten badu». 20.000-30.000 erle hil zaizkio guztira.



«Orain dela hamabost urte eraiki genuen erlategi hori, eta berriki konpondua genuen; beraz, biziki egoera onean zen. Guretzat garrantzi berezia zuen, bikoizteko asmoa genuelako». Erlezaina da Salles, eta Baionako Loreztia saltegiaren nagusia. Erreximenta du ekoizpen nagusia, eta, beraz, ez du enpresa arriskuan ikusten, baina «kolpe handia da». Irria ez du galtzen, hala ere, eta baikor gelditu nahi du: «Biologikora pasatzeko asmoa genuenez, urratsa egiteko baliatuko dugu». Ez du salaketa emateko asmorik, baina departamenduko albaitaritza zerbitzuak deitu ditu erleekin zer gertatu den azter dezaten.



Galtzeko arriskuan

Galtzeko arriskuan den espeziea da erleena, eta azken urteetan, Eskualdeko Kontseiluak laguntzak eman izan ditu erlategiak berriz betetzeko. Bestela, herritarrak interpelatzea beste biderik ez du ikusten Sallesek.



«Azken urteetan, neguan, lehen baino erlauntz gehiago galtzen ditugu: lehen, %5-10, eta orain, %30-40 ere bai». Elementu andana bat ikusten du hori esplikatzeko: parasitoak, Asiako liztorra, tenperatura aldaketa, baina baita hainbat lore mota galtzea ere. «Guk ere beti gauza bera janen bagenu, ahulduko ginateke». Gogor mintzo da: «Laborantza munduak eta, orokorrean, eraiki dugun munduak erlea ahultzen dute». Herritarrentzat ere badu mezua: «Kasu egiten duzuenari. Anitzetan, laborariak baino okerragoak dira norbanakoak beren baratzeetan».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna