Osasunak lider jartzeko aukera dauka gaur, Gijonen irabazita

Osasuna hamabigarren postuan eta lidergotik hamabi puntura zegoen ligako lehen 11 jardunaldiak jokatuta. Hiru hilabete igaro dira geroztik, eta gorritxoen egoera goitik behera aldatu da: goiko postuetan finkatu dira azken hamahiru partidetatik hamar irabazita. Gaur beste urrats bat nahi dute, Gijonen (Espainia) irabaziz gero lider izango liratekeelako behin-behinean.

Erronka handia da Nafarroako taldearentzat, ligan ia 33 urte baitaramatza Molinonen garaipenik lortu gabe; 1986ko otsailaren 23an irabazi zuen bertan azkenekoz. Geroztik, hamazazpi aldiz egin dio bisita Sportingi, eta beldurgarriak dira estatistikak: sei partida berdindu eta 11 galdu ditu. Edonola, oroitzapen gozorik ere badu Sportingen zelaiaz; hala nola 1999-2000ko denboraldian urrats handia egin zuen Lehen Mailara igotzeko bidean, azken-aurreko jardunaldian puntu bat urratuta.

Irabazita ere, gaur ezingo du halako pauso erabakigarririk eman, oraindik urrun baitago sasoi amaiera. Dena den, behin-behineko lidergoa ere ez da edonolako saria. Jagoba Arrasaterentzat, «azterketa» izango da gaurko lehia: «Benetan nola gauden ikusteko balioko digu. Golik ez dugu jaso azken hiru partidetan, baina bihar [gaur] Sportingek lanak emango dizkigu».