Albistea entzun

Atzean du galbidea

Domenico Tedescoren gidaritzapean itxura askoz ere sendoagoa ematen ari da Leipzig. Joko landua da taldearen ezaugarri nagusia, eta arrisku handiak hartzen ditu baloia atzetik jokatuta ateratzean. Bihar Realaren aurka jokatuko du.
BERRIA Tamaina handiagoan ikusi

Iñaki Berastegi -

2022ko otsailak 16

Iazko abenduaren 13an Europa Ligako final-zortzirenen aurreko kanporaketako zozketa egin zenetik, Leipzig talde alemaniarrak nabarmen egin du hobera. Txapeldunen Ligatik kanpo eta Bundesligako sailkapenean hamaikagarren tokian zegoela ikusita, abenduaren 9an, zuzendaritzak Jesse March entrenatzaile estatubatuarra kargutik kendu, eta Domenico Tedesco 36 urteko italiarrari eman zion taldea zuzentzeko ardura. Asmatu dute. Ordutik, Alemaniako ligako zortzi partida jokatu dira, eta horietan hamasei puntu eskuratu ditu zezenen taldeak. Denboraldian estreinakoz, aurreneko lau sailkatuen artean kokatu da. Emaitzetan ez ezik, jokatzeko moduan ere aldaketa izan du taldeak. Julian Nagelsmannen garaiko bost jokalariko atzealdea berreskuratu du Tedescok, eta Marchen taldeak baino joko landuagoa egiten du. Ez da iazko Leipzig beldurgarri hura, baina aurkari zaila da. Atzeko lerroan da ahula.

SISTEMA
Hiru erdiko atzelarirekin

Tedescok marrazki bera erabili du zuzendu dituen ligako zortzi neurketetan: 1-3-4-1-2. Dena den, tarteka edo partidaren zati batzuetan, bi aurrelarirekin jokatu beharrean aurrelari bakarraren alde ere egin du. Beraz, hiru erdiko atzelari, bi hegaleko jokalari eta bi euskarrirekin jokatzea negoziaezina da. Hegaleko bi jokalariak joan-etorri handikoak dira, eta bi euskarriek, lan handia egiteaz gain, mugikortasun handia dute. Erasoko jokalariei dagokienez, teknikoki iaioak diren jokalari azkarrak zelairatu ohi ditu hasieratik. Askatasun handia ematen die guztiei.

ESTILOA
Joko landuagoa

Jesse Marchen joko zuzen eta bertikala apur bat ahaztu, eta joko landuagoaren alde egin du teknikari italiarrak. Motzean abiatzen dituzte atzetik jokaldi guztiak, arrisku handiak hartuz. Peter Gulacsi atezainak oso gutxitan jokatzen du baloia aurrelarietara zuzenean, Yussuf Poulsen aurrelari garaia zelaian dagoenean baino ez. Hegaletara eraman nahi izaten du taldeak baloia, bertatik erdiraketak jarri edo, nagusiki, erasoko hiru jokalariek azken metroetan askatasuna izan dezaten.

ERASOAN
Hegaletatik barrura

Gulacsirengandik hasten dira jokaldi guztiak. Baloia motzean jokatzen dute, eta Josko Gvardiol atzelaria da baloia ondo jokatuta ateratzeko aukerarik onena, Willi Orbanek eta Lukas Klostermannek zailtasunak baitituzte zeregin horretan. Euskarrietako bat hegalera etortzen da besteak erdigunea babesten duen bitartean, eta, hala, bi hegaleko jokalariek are eta altuera handiagoa hartzen dute. Baloia atzetik jokatzean asko arriskatzen dute, eta makina bat gol sartu dizkiete area inguruan baloia galdu eta gero. Esaterako, Bayern Munichen aurkako ligako neurketan, Bavariako taldeak bi gol sartu zizkien horrela. Edonola ere, lehenengo presio hori gainditzea lortzen dute askotan, euskarriarekin eta hegalekoarekin alboetan nagusitasunak bilatuz. Behin hegaletara iritsita, bertatik barrura bideratzen dute jokoa, maila teknikoko jokalari bikain eta oso azkarrak dituztelako azken lerroan. Elkar oso ondo ulertzen dute, eta baloia gutxi ukituta arrisku handia sortzen dute. Angeliño galiziarraren ezker hegaletik egiten dituzte eraso guztien %41.

DEFENTSAN
Itzuleran sufrituz

Taldea erasoan ari denean baloia galtzen badu, arazo asko sortzen dizkiote. Izan ere, jokalari askorekin antolatzen du erasoa, Gvardiol eta Klostermann erdiko atzelariak eta bi hegalekoak, Angeliño eta Mukiele oso aurrera joaten dira, eta atzealdean zulo handia uzten dute. Aurkariak presiotik ateratzea lortzen badu, bi hegalekoei itzultzea asko kostatzen zaienez, horien bizkarrera metro asko ditu erasoa antolatzeko. Kampl eta Laimer euskarriek eman behar izaten diote oreka taldeari, baina horiek ere ez dira izatez oso euskarri defentsiboak. Horrez gain, geldikako jokaldietan eta area txikia defendatzen ere zailtasunak izaten ditu taldeak. Dayot Upamecano (Bayern Munich) eta Ibrahima Konate (Liverpool) aurreko denboraldiko bi erdiko atzelari titularrak galtzeak sendotasun handia kendu dio. Gol asko sartzen ditu, baina asko sartzen dizkiote: 27 gol sartu dizkiote ligako 22 neurketatan, eta 14 Txapeldunen Ligako multzoen fasean. Normalean, presioa oso aurrean egiten du zelaian dituen bi aurrelariekin, eta hegaletara bideratzen ditu aurkariak, bertan baloia berreskuratzeko.

JOKALARIAK
Nkunku, onenen pare

Christopher Nkunku bere ibilbideko denboraldirik onena egiten ari da. Andre Silvaren alboan jokatzen du. Hemeretzi gol sartu, eta hamar goleko pase eman ditu, 31 partidatan. Teknikoki oso ona da, eta fisikoki, azkarra ez ezik, gaitasun handikoa. Haren ondoan jokatzen du Andre Silva portugaldarrak, eta hark ere bere-berea du gol sena. Bizkarrez jokatzen ere badaki, eta hori bikain aprobetxatzen du Nkunkuk. Horien atzetik, Dani Olmok, Emil Forsbergek eta Dominik Szoboszlaik jokatu ohi dute: azken pasea ematen eta bigarren lerrotik arriskua sortzen trebeak dira hirurak ere. Azkenik, Angeliño galiziarra ere aipatu behar da. Ezker hegaleko sastakaia da, ondoko marrara etengabe iristen den jokalari txiki eta azkarra. Sakontasuna eta anplitudea ematen dio taldeari.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©MARISOL RAMIREZ / FOKU

«Jokalariak joan diren arren, multzo indartsua daukagu»

Ainara Arratibel Gascon

Luzera begirako helburuei baino gehiago, Unzuek «eguneroko lanari» erreparatu nahi dio. Uste du hori dela goiko postuetan egoteko bidea. Lehiakor izan nahi dute beste behin ere.
Berazubin aurkeztu zen atzo Euskal Herria Kopako. ©ANDONI CANELLADA / FOKU

Euskal Herria Kopa prest dago

Ainara Arratibel Gascon

Alaves-Eibar eta Reala-Athletic izango dira finalerdietan. Finala irailaren 4an jokatu da

Irati Osa piraguista entrenamenduetako batean. ©BERRIA

Ur lasaiak, laster bilakatzen

Pettan Uralde

Irati Osak beste domina bat gehitu dio bere sarien zerrendari. Zumaiarrak brontzezko domina lortu zuen aurreko astean, Danimarkako Europako Txapelketan, K2 mailan.

Serena Williams Wimbledoneko neurketa batean, aurtengo ekainean. ©ANDY RAIN

Serena Williamsek erretiroa hartuko du

Uxue Rey Gorraiz

Tenislari estatubatuarrak iragarri du Estatu Batuetako Irekia izanen duela azken txapelketa. Orduan esanen dio agur tenis profesionalari, 40 urterekin. 23 Grand Slam irabazi ditu orain arte.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...