HIZPIDEAK

Keinua

Jakes Goikoetxea -

2018ko irailak 14
Ez da gutxiestekoa Emmanuel Macron Frantziako presidentearen keinua, besteak beste haren aurretik karguan egon direnek aukera izan dutelako eta uko egin diotelako agerikoa eta jakina zena onartzeari; baina keinua, ikuspegi historiko batetik, Frantziak aljeriarren kontra egindako gehiegikeriak eta sarraskiak ikusita, Aljerian bertan eta Aljeriatik kanpo —Parisen, 1961ean, esaterako—, hondar ale bat baino ez da urteetako zor historikoaren amildegian, tirita bat odolez hutsarazitako herrialde baten zauri zornatuan. Rachid Taha musikari aljeriar zendu berriak esana zen Frantziak ezin zuela Aljeria zintzurretik irentsi.

Macronek onartu du 1957an Frantziako armadak atxilotu, torturatu, hil eta desagerrarazi egin zuela Maurice Audin, matematikaria, komunista eta Aljeriaren independentziaren aldeko militantea. Eta haren desagerketa posible izan zela gobernuek segida eman zioten atxiloketa sistema bati esker, tortura arma gisa erabili zela, tortura kasuetan inpunitatea izan zela... Macronek Aljeriako desagertuei buruzko artxiboak zabalduko ditu. Egia jakiteko urratsa da, baina egiaz gain, justizia eta erreparazioa ere behar dira.

Egindako eta eragindako minaren neurriko erantzuna. Jean Louis Davantek esan zuen, Aljerian bizitakoaz: «Alemanak ikusi ditut nik hemen [Euskal Herrian] gerra denboran. Eta alemanak hemen ziren bezala nintzen han [Aljerian]».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna