Biktimen izaeraz

Nazien kolaboratzaile eta frankismoaren polizia torturatzailea izan zen Meliton Manzanas. Ehunka lagun bortizki torturatu zituen —batzuk hil ziren tratu txarren erruz—, eta nabarmendu egin zen bere krudelkeriagatik. 1968ko abuztuaren 2an hil zuen ETAk. Orduko Euskal Herriko giroan asko poztu ziren atentatu horrengatik, eta halaxe nabarmendu dute Manzanasen torturen biktima izan eta testigantza eman dutenetako askok.

Hilketa horrek mugarri bat ezarri zuen ETAren ibilbidean. Aurten, betirako itxi du bere bidea erakunde armatuak, eta gatazka politiko-armatuaren kontakizun historikoaren atala zabaldu da. Alde horretatik, Manzanasen eta beste biktima batzuen jiteak galdera bat jartzen dute mahai gainean: ea ETAren biktima guztiek tratu bera merezi duten kontakizun horretan. Ea guztiek merezi duten barkamen eskea, Jaurlaritzak aurten ETAri galdegin dion moduan.

Alemanian edo Frantzian Manzanas bezalako bat hil bazuten, «erresistentziako» kideek izango zuten erakundeen aitortza. Espainian, Manzanasek berak jaso zuen, 2001ean, Terrorismoaren Biktimen Aitortza Zibilaren Gurutze Handia. «Legeak irizpide objektiboak ditu, eta ez du epaitzen pertsona horien ibilbidea», esan zuen orduko gobernuko eledunak. Nekez topa daiteke amarru hoberik krimenik lazgarrienak zuritzeko.