Zerk elkartzen ditu Espainiako herritarrak? Ba, ez gauza askok. Estatu batek elkartzen ditu, hori bai. Esan liteke hizkuntza batek ere elkartzen dituela, baina beste hizkuntza batzuk azpiratuta bihurtu da elkarren. Historia, izan zitekeen, baina historiak komenentziaren arabera berridazten dira.
Euskal herritarrengatik gauza bera esan zitekeen, baina negatiboan jarrita. Zerk zatitzen ditu euskal herritarrak? Estatu bat ez izateak. Bertan bizi direnen erdiek ez dakiten hizkuntza batek, azpiratua izan delako guztiena ez den hizkuntza batek. Historiak ere bai, bestek idatzi dituztelako euskal herrien historia ofizialak.
Alderdikeriek ere zatitzen dituzte euskal herritarrak; gutxienez oinaztarren eta beaumontarren garaitik datozen familia politikoek —lehenagotik ez bada—. Probintziakeriek ere bai; eta debaldeko kirol liskarrek. Ideologiek. Interesek. Adinak. Soldatek. Generoak. Beldurrek ere bereizten dituzte euskal herritarrak. Beste edozein herrialderi buruz esan zitekeen gauza bera. Kataluniari buruz, Islandiari buruz. Kontua da Kataluniak ez duela estaturik, eta Islandiak bai.
Aberri Eguna «batera», elkarrekin, ospatzera dei egin du herritar talde batek. Athleticeko eta Realeko zaleak batak bestearen garaipenengatik pozten eta porrotengatik penatzen diren egunean errazagoa izango da ikustea euskal herritarrak zerk batzen dituen. Historia eta hizkuntza berreskuratu litezkeelako. Baina estatua izateko zerbait gehiago beharko da.
HIZPIDEAK
Batera
Iruzkinak
Ez dago iruzkinik
Ordenatu