Albistea entzun

HIZPIDEAK

Murgiltzea, ezinbestean

Iñaki Petxarroman -

2022ko otsailak 9 - @petxarroman

Eusko Legebiltzarreko Hezkuntza Batzordeko lehendakariak argitaratu duen lege berrirako proposamenak baditu aintzat hartzeko moduko zenbait atal. Batetik, azken urteotan larriagotu den eskola segregazioari aurre egiteko tokiko kontseiluek duten rola nabarmendu du, udalerria ardatz duten patronatuen bidez. Antzeko egiturak martxan jarri diren beste leku batzuetan —Katalunian, kasurako— emaitza onak izan dira, eta, beraz, aukera ona izan daitezke kultur aniztasunerako eta integrazio orekatu bat bultzatzeko.

Horretarako, baina, ezinbestekoa da euskara ardatz izango duen hezkuntza sistema bat martxan jartzea. Atzo aurkeztutako proposamenak dio ikasleek maila berean menperatu behar dituztela euskara eta gaztelania DBH amaitzean. Gaur egun hori berma dezakeen eredu bakarra D eredua da.

Agiriak ez du aipatu «murgiltze eredua», baina erabili duen formulazio anbiguoak —«euskara ardatz duen sistema eleaniztuna»— ez du argi uzten nondik nora joko duen lege berriak gai honetan, segur aski Espainiako epaileek Katalunian hasitako jazarpena saihesteko. Anbiguotasunaren atzean murgiltze eredua unibertsalizatzeko asmoa badago, euskara irabazle irtengo da; egungo ereduari eusteko maniobra bat bada, gutxienez bi hamarkada galduko dira ikasle guztien benetako euskalduntzea bermatu ezinik.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...