HIZPIDEAK

N-121-A: urgentzia

Garikoitz Goikoetxea -

2020ko urtarrilak 14
Beste bi lagunen bizia irentsi du N-121-A errepideko asfaltoak Nafarroan: bi gazte hil ziren larunbatean, 19 eta 21 urteko bi mutil, lau autok eta kamioi batek istripua izanda. Bi gazte, zerrenda beltz bati eransteko: hamar urtean 31 lagun hil dira errepide horretan. Ez da lista bakarra: ia 300 lagun zauritu dira hamar urtean. Errepide sareko leku arriskutsuenetako bat da.

Urteak dira inguruko udalak eta herritarrak soluzio eske ari direla. Egia da erakundeek neurri batzuk hartu dituztela errepidearen segurtasuna areagotzeko, baina bistakoa da ez direla aski. Kontuan izan behar da errepide horren rola: batetik, Nafarroa iparraldearen eta erdialdearen arteko lotura da, Iruñearen eta iparraldeko eskualdeen artekoa; bestetik, Iruñetik Irunerako igarobidea da, Europako joan-etorrietarako bidea, doakoa. Nafarroako Gobernuak berak aitortua du bi arazo dituela errepideak: zirkulazio handia —egunean 11.000 ibilgailu inguru—, eta kamioien presentzia handia —lau ibilgailutik bat—. Izatez, urtez urteko bilakaera proportzioan aztertuta, gero eta gehiago dira kamioiak.

Ezinbestekoa da, beraz, N-121-A errepidean neurriak jartzea. Batetik, bidean bertan aplikatu behar dira neurri batzuk —mahai gainean dago lerroak areagotzeko plan bat—; bestetik, errepide horren funtzioa zehaztu behar da —eskualde arteko bidea den, edo goragokoa—. Presazkoa da neurriak hartzea.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna