HIZPIDEAK

PSEren muga

Jon Ordoñez Garmendia -

2018ko uztailak 7
Esanguratsua da PSE-EEko kide bati egokitzea muga jartzea. Batetik, EAJ lan bat egiten ari da Eusko Legebiltzarreko Autogobernu Lantaldean, baina, bestetik, Eusko Jaurlaritzako bere bazkideak horren kontra egingo du, Gasteizko parlamentuan boto partikularra aurkeztuz eta Madrilen, atzo Isabel Zelaa PSEko kide eta Espainiako Gobernuko bozeramaileak aurreratu zuenez, estatus politikoari buruzko galdeketa gaitzaile batek Gernikako Estatutuan lekurik ez duela esanez.

Hilabeteko lanaren ondoren, emaitza ematen hasi da Autogobernu Lantaldea. Horretarako sortu zuten, baina emaitza ematen hasi orduko atera dira bidera lantaldean parte hartu bai baina zer emaitza eman behar ez duen diotenak. Iraganekoa edo beste Espainiako Gobernu batena izan zitekeen traza agertu da. Odon Elorzak ere esan du aste honetan, PSEko kidea hori ere: «zatiketa politiko eta soziala» eragin dezakeela legebiltzarraren gehiengoaren babesarekin onartu den estatus politiko berriaren oinarriak, «Katalunian bezala». Touché. Gutxiengoak ez omen du zatitzen.

Edozein kasutan bide luzea du egiteko oraindik estatutu berriak. Eta, galdeketa gaitzaileak denbora alde izango duenik esan ezin badaiteke ere, ikuspegi demokratiko batetik geroz eta zentzu gutxiago izango du estatutu politiko zaharra ordezkatu behar duen estatutu berriari mugak jartzeak, zaharrak aukera hori jasotzen ez duela argudiatuta. Hori ez da helmuga. PSEren muga da.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna