Txinatik dator atsotitza: «Tximeleta baten hegalen mugimenduak munduaren beste muturrean tsunami bat eragin dezake». Txerriak dira, eta ez tximeletak, kasu honetan munduko beste muturrean eragina izan dutenak. Txerrien izurri afrikarraren eraginez, milioika txerri akabatu behar izan dituzte Txinan —2018an zituzten 400 milioi txerrietatik erdiak-edo— eta hango eskariari erantzuteak munduko beste tokietan izan du eragina, baita Euskal Herrian ere.
Txerriei erasaten dien gaitzak mugak gainditu ditu, ez hainbeste krisi sanitario gisa, baizik eta ekonomia globalizatu baten testuinguruan. Txinatarrek txerrikia kontsumitzen jarrai dezaten, mundu osotik ari baitira txerrikia inportatzen. Euskal Herriko hiltegietan ia %50 igo da txerri haragiaren prezioa urtebetean, eta saltokietan ere hasiko dira bezeroak igoera antzematen.
Txerriak Euskal Herrian hazi, hil eta banatzen dituzten ekoizle txikiagoek diotenez, ordea, ez dute ondoriorik sufritu, ez dute preziorik igo, eta aukera baliatu nahi dute, kanpora jo gabe, euren merkatua sendotzeko. Jokaleku globalean kalterik sufrituko ez duten bakarrak ekoizpen industrial eta intentsiboetatik at daudenak izango direla dirudi, ekoizle txikiak eta hurbileko merkatuetan mugitzen direnak. Tokikoa babesteak badu zentzua, beraz.
HIZPIDEAK
Tximeleta efektua
Iruzkinak
Ez dago iruzkinik
Ordenatu