Albistea entzun

HIZPIDEAK

Aitortza

Mikel P. Ansa -

2022ko uztailak 1 - @peruarenaansa

Biktima hitza gatazka politikoari lotu izan zaio ia erabat, duela gutxi arte, baina era askotako biktimak geratu dira bide bazterrean. Eta zokorik zokoenetako batean, apaiz eta mojen sexu abusuak jasandako umeak. Beren burua ahal zuten bezala berreraiki behar izan dute, apenas laguntzarik gabe. Baina Elizak garai batean zuen botere erabatekoa laurdenkatu egin da bi belaunalditan, eta abusuak jasandako beste pertsona batzuk plazara atera izanak hauspotuta hasi dira dozenaka kasu gehiago ateratzen. Epaitegietara eta komisarietara iritsi dira salaketa horietako batzuk, eta bertan ito. Aspaldi esana da egungo legeak ez daudela behar bezala pentsatuta halako auziak epaitzeko; ikusi denez, ume traumatizatuek bizialdi bat ia osoa behar izaten dutelako halakoak jendaurrean salatzera ausartzeko; halako salaketek, gertatzen direnean, umeak biktima bihurtzen dituztelako ere bai. Gabezia handi bat du gizarteak arlo horretan, eta horregatik, bere xumean, Nafarroako Parlamentuak atzo onartutako legeak badu garrantzia. Hemen inguruko erakunde publiko batek lehen aldiz aitortu dituelako biktima horiek. Eta aitortza publiko hori da, sarri askotan, zauriak ixten hasteko ezinbesteko osagaietako bat. Eta horrekin batera, abusu horien egia osatzeko prozedura bat ere zehaztu dute. Legeak ez du ondorio juridikorik izango, baina urte gehiegiz zokoratuta edukitako biktima batzuen bizitzak duintzen hasteko balioko du.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Irakurleen babesa ezinbestekoa da kazetaritza independente eta konprometitua egiten jarraitzeko.